डी ११ टी २० क्रिकेट स्पर्धा ः अष्टपैलू दीपक जगताप सामनावीर
छत्रपती संभाजीनगर ः डी स्पोर्ट्स प्रेझेंट्स डी ११ टी २० लीग क्रिकेट स्पर्धेत लकी क्रिकेट क्लब संघाने उपांत्य फेरी गाठली आहे. उपांत्यपूर्व सामन्यात लकी क्रिकेट क्लबने इथिकल क्रिकेट अकादमीचा ८७ धावांनी पराभव केला. या लढतीत दीपक जगताप याने सामनावीर पुरस्कार पटकावला.
रुफीट क्रिकेट मैदानावर ही स्पर्धा होत आहे. बाद फेरीच्या पहिल्या सामन्यात लकी क्रिकेट क्लबने नाणेफेक जिंकून प्रथम फलंदाजी करण्याचा निर्णय घेतला. फलंदाजांनी स्फोटक फलंदाजी करुन हा निर्णय सार्थ ठरवला. लकी क्लबने २० षटकात आठ बाद २२९ अशी भक्कम धावसंख्या उभारुन सामन्यावर वर्चस्व गाजवले. एवढ्या मोठ्या आव्हानाचा पाठलाग करताना इथिकल क्रिकेट अकादमी संघाने २० षटकात नऊ बाद १४२ धावा काढल्या. लकी क्लबने तब्बल ८७ धावांनी सामना जिंकला व उपांत्य फेरीत प्रवेश केला. या स्पर्धेत उपांत्य फेरी गाठणारा लकी क्रिकेट क्लब हा पहिला संघ ठरला आहे.
या सामन्यात दीपक जगताप याने आक्रमक अर्धशतक ठोकले. दीपकने अवघ्या २४ चेंडूत ६१ धावांची वादळी खेळी साकारली. त्याने चार चौकार व टोलेजंग सहा षटकार ठोकत मैदान गाजवले. सय्यद इम्रान याने २९ चेंडूत ५२ धावांची वेगवान खेळी केली. त्याने पाच उत्तुंग षटकार व चार चौकार मारले. साहिल तडवी याने ३५ चेंडूत ४२ धावांची दमदार खेळी साकारताना सहा चौकार मारले.
गोलंदाजीत योगेश लिंगायत याने प्रभावी गोलंदाजी करत ४१ धावांत तीन विकेट घेतल्या. अफताफ शेख याने १६ धावांत दोन बळी घेतले. दीपक जगताप याने १३ धावांत दोन गडी बाद करुन अष्टपैलू कामगिरी बजावली. या अष्टपैलू कामगिरीने दीपक जगताप हा सामनावीर ठरला.
