राष्ट्रीय स्पर्धेसाठी महाराष्ट्र संघात निवड
छत्रपती संभाजीनगर : क्रीडा व युवक सेवा संचालनालय, महाराष्ट्र राज्य पुणे यांच्या अंतर्गत जिल्हा क्रीडा अधिकारी कार्यालय आणि जिल्हा क्रीडा परिषद, छत्रपती संभाजीनगर यांच्या संयुक्त विद्यमाने आयोजित राज्यस्तरीय शालेय तायक्वांदो स्पर्धेत जळगाव जिल्ह्याच्या खेळाडूंनी उल्लेखनीय यश संपादन केले आहे.
जळगाव जिल्हा तायक्वांदो असोसिएशन, जैन स्पोर्ट्स अकॅडमी आणि नंदिनीबाई महाविद्यालय यांच्या प्रतिनिधी म्हणून सहभागी झालेल्या निकिता पवार हिने १९ वर्षांखालील मुलींच्या ५५ किलो वजनगटात सुवर्णपदक जिंकत महाराष्ट्राच्या संघात स्थान निश्चित केले आहे. निकिता जम्मू-काश्मीर येथे होणाऱ्या आगामी राष्ट्रीय शालेय तायक्वांदो स्पर्धेत महाराष्ट्राचे प्रतिनिधित्व करणार आहे.
तिच्या या यशासोबतच जळगाव जिल्ह्यातील इतर खेळाडूंनीही उल्लेखनीय कामगिरी केली आहे. त्यात देवयानी पाटील (नुतन मराठा विद्यालय) हिने ४२ किलो वजनगटात कांस्यपदक पटकावले. तसेच स्पर्श मोहिते (अनुभूती निवासी स्कूल) हिने कांस्य पदकाची कमाई केली. मयुर पाटील (१७ वर्षांखालील मुले) याने कांस्यपदक जिंकले.
या सर्व खेळाडूंना प्रशिक्षक जयेश बाविस्कर तसेच मुख्य प्रशिक्षक अजित घारगे यांचे मोलाचे मार्गदर्शन लाभले.
या विजेत्या खेळाडूंचा जळगाव जिल्हा तायक्वांदो असोसिएशनतर्फे सत्कार करण्यात आला. यावेळी असोसिएशनचे अध्यक्ष अतुलभाऊ जैन, उपाध्यक्ष ललित पाटील, खजिनदार सुरेश खैरनार, सचिव अजित घारगे, सहसचिव रवींद्र धर्माधिकारी, सदस्य नरेंद्र महाजन, कृष्णकुमार तायडे, महेश घारगे, सौरभ चौबे, तसेच जैन स्पोर्ट्स अकॅडमीचे अरविंद देशपांडे उपस्थित होते. सर्व मान्यवरांनी खेळाडूंना पुढील राष्ट्रीय स्तरावरील स्पर्धेसाठी शुभेच्छा दिल्या.
