राष्ट्रीय स्पर्धेसाठी महाराष्ट्राचा संघ निवडणार
मलकापूर (बुलढाणा) ः बॉल बॅडमिंटन या क्रीडा प्रकाराला प्रोत्साहन देण्यासाठी मलकापूर येथे ७० व्या महाराष्ट्र राज्य ज्युनिअर बॉल बॅडमिंटन (मुली) अजिंक्यपद स्पर्धेचे आयोजन करण्यात आले आहे.
महाराष्ट्र राज्य बॉल बॅडमिंटन असोसिएशन, बुलढाणा जिल्हा बॉलबॅडमिंटन असोसिएशन आणि यशोधाम पब्लिक स्कूल यांच्या संयुक्त विद्यमाने शाळेच्या २५ व्या रौप्य महोत्सवानिमित्त ही स्पर्धा ५ ते ७ नोव्हेंबर दरम्यान पार पडेल.
प्रमुख आकर्षण आणि सहभाग
३१ संघाचा सहभाग : या स्पर्धेत पुणे, मुंबई, ठाणे, नाशिक, जळगाव, नागपूर, अमरावती, लातूर तसेच यजमान बुलढाणा जिल्ह्यासह राज्यातील ३१ मुलींच्या जिल्हा संघातील एकूण ३०० हून अधिक खेळाडू विजेतेपदासाठी झुंज देतील.
राष्ट्रीय संधी : या स्पर्धेतून महाराष्ट्राचा बलढ्य संघ निवडला जाईल, जो आगामी काळात तामिळनाडू येथे होणाऱ्या राष्ट्रीय अजिंक्यपद स्पर्धेत राज्याचे प्रतिनिधित्व करेल, अशी माहिती महाराष्ट्र संघटनेचे सचिव अतुल इंगळे आणि निलेश महाजन यांनी दिली.
योजनेचा अनुभव : बुलढाणा जिल्हा बॉल बॅडमिंटन असोसिएशनच्या माध्यमातून यापूर्वीही अनेक राज्य आणि राष्ट्रीय स्पर्धांचे यशस्वी आयोजन करण्यात आले आहे. मलकापूर शहराने आजवर अनेक राज्य व राष्ट्रीय खेळाडू दिले आहेत, अशी माहिती असोसिएशनचे सचिव विजय पळसकर यांनी दिली.
स्पर्धेची तयारी
स्पर्धेसाठी उत्कृष्ट दर्जाचे चार कोर्ट तयार करण्याचे काम युद्धपातळीवर सुरू आहे. तीन दिवस चालणाऱ्या या स्पर्धा सकाळी आणि संध्याकाळी प्रकाशझोतात खेळल्या जातील. यशोधाम पब्लिक स्कूलचे अध्यक्ष डॉ वैभव महाजन यांच्या मार्गदर्शनाखाली खेळाडूंसाठी आरामदायी निवास आणि उत्तम भोजनाची व्यवस्था करण्यात येत आहे. प्राचार्या पी उषा, राजेश्वर खंगार, डॉ नितीन भुजबळ, धीरज चवरे, संदीप मुंढे, प्रफुल्ल वानखेडे आदी स्पर्धेच्या यशस्वीतेसाठी विशेष योगदान देत आहेत.
