ईएमएमटीसी – एमएसएलटीए १४ वर्षाखालील क्ले कोर्ट राष्ट्रीय टेनिस स्पर्धेत मोठी चुरस
छत्रपती संभाजीनगर ः ईएमएमटीसीतर्फे आयोजित व एटीएफ, एआयटीए व एमएसएलटीए यांच्या मान्यतेने होत असलेल्या ईएमएमटीसी – एमएसएलटीए १४ वर्षाखालील क्ले कोर्ट राष्ट्रीय टेनिस अजिंक्यपद स्पर्धेत मुलींच्या गटात सृष्टी सूर्यवंशी हिने तर मुलांच्या गटात स्मित उंद्रे, ऋषिकेश माने, महेश रुनमान यांनी मानांकित खेळाडूंना पराभवाचा धक्का देत आजचा दिवस गाजवला.
ईएमएमटीसी टेनिस कॉम्प्लेक्स छत्रपती संभाजीनगर येथे सुरू असलेल्या या स्पर्धेत मुख्य ड्रॉ मध्ये उप उपांत्यपूर्व फेरीत मुलांच्या गटात सोळाव्या मानांकित महाराष्ट्राच्या स्मित उंद्रेने दुसऱ्या मानांकित कर्नाटकच्या अर्जुन मणिकंदनचा ६-१, २-६, ६-४ असा तीन सेटमध्ये पराभव करून सनसनाटी निकाल नोंदवला. बाराव्या मानांकित कर्नाटकच्या महेश रुनमान याने पंजाबच्या पाचव्या मानांकित तनिश नंदाचा ६-२, ४-६, ६-१ असा पराभव करून उपांत्यपूर्व फेरीत धडक मारली. बिगर महाराष्ट्राच्या ऋषिकेश माने याने नवव्या मानांकित गुजरातच्या हित कंडोरिया चा ६-१, ६-१ असा पराभव करून आपली अनपेक्षित निकालाची मालिका कायम ठेवली.
मुलींच्या गटात दुसऱ्या फेरीत महाराष्ट्राच्या सृष्टी सूर्यवंशी हिने अव्वल मानांकित कर्नाटकच्या पद्मा रमेश कुमारचा ६-४, ६-३ असा पराभव करून खळबळजनक निकाल नोंदवला. सहाव्या मानांकित महाराष्ट्राच्या श्रावी देवरेने तेलंगणच्या अनिक्षा गव्हिनोल्लाचा ६-०, ६-० असा एकतर्फी पराभव केला.
