सहा विभागीय सचिव बिनविरोध विजयी, उपाध्यक्षपदासाठी २३ उमेदवार रिंगणात
मुंबई : महाराष्ट्र बॉक्सिंग संघटनेची वार्षिक निवडणूक रविवार, ९ नोव्हेंबर २०२५ रोजी धर्मादाय आयुक्त कार्यालय, वरळी, मुंबई येथे पार पडणार आहे. सकाळी १० ते दुपारी ३ वाजेपर्यंत मतदानाची वेळ निश्चित करण्यात आली असून संपूर्ण निवडणूक प्रक्रिया धर्मादाय आयुक्त तथा निवडणूक अधिकाऱ्यांच्या देखरेखीखाली होणार आहे.
या निवडणुकीत अध्यक्ष, १६ उपाध्यक्ष, महासचिव, खजिनदार, कार्यकारी सचिव, व्यवस्थापकीय सदस्य आणि विभागीय सचिव या महत्त्वाच्या पदांसाठी निवड प्रक्रिया होणार आहे. दरम्यान, खजिनदार पदासाठी नाशिकचे ॲड मनोज पिंगळे हे बिनविरोध निवडून आले आहेत.
विभागीय सचिव या पदासाठी एकूण आठ जागा असून त्यापैकी सहा उमेदवार बिनविरोध विजयी ठरले आहेत. त्यात नाशिकचे मयूर बोरसे, कोल्हापूरचे मंगेश कराळे, लातूरचे ॲड संपत साळुंखे, छत्रपती संभाजीनगरचे अरुण भोसले, पुण्याचे विजयकुमार यादव आणि अमरावतीचे विजय गोटे यांचा समावेश आहे.
निवडणुकीची मोठी उत्सुकता
या निवडणुकीकडे राज्याच्या क्रीडा क्षेत्राचे लक्ष लागलेले आहे. अध्यक्षपदासाठी प्रवीण दरेकर आणि रणजीत सावरकर यांच्यात थेट लढत होणार आहे. महासचिव पदासाठी भरतकुमार व्हावळ आणि राकेश तिवारी यांच्यात निवडणूक होईल. कार्यकारी सचिव या पदासाठी शैलेश ठाकूर, सविता बावनथडे आणि प्रशासकीय सचिव पदासाठी महेश सकपाळ व नीलम पाटील यांच्यात लढत होत आहे.
उपाध्यक्ष पदासाठी एकूण २३ उमेदवार रिंगणात आहेत. त्यात पंकज भारसाखळे, मुन्ना कुरणे, मिलिंद साळुंके, तुषार रंधे, अविनाश बागवे, संग्राम गावंडे, गौतम चाबुकस्वार, गौरव चांडक, राजेश देसाई, शेख गफ्फार अकबर, वैभव वनकर, संतोष आंबेकर, विक्रांत खेडकर, नील पाटील, शाहुराज बिराजदार, अरुण बुटे, जयप्रकाशप दुबळे, अमर भंडारवार, नीलम पाटील, गोपाल देवांग, राजाराम दळवी, विजय सोनावणे यांच्यात लढत होत आहे.
नवीन कार्यकारिणीवर राज्यातील बॉक्सिंग खेळाचा विकास, स्पर्धांचे नियोजन, खेळाडूंना प्रशिक्षण सुविधा, जिल्हा-अंतरराष्ट्रीय स्पर्धांतील सहभाग आणि धोरणात्मक नियोजनाची मोठी जबाबदारी असणार असून निवडणुकीकडे क्रीडा वर्तुळाचे लक्ष लागले आहे. सर्व मतदारांना ठरलेल्या वेळेत उपस्थित राहून मतदान करण्याचे आवाहन करण्यात आले आहे.
