नवी दिल्ली ः दिल्लीतील लाल किल्ला मेट्रो स्टेशनजवळ एका आय-२० कारमध्ये मोठा स्फोट झाला.या स्फोटानंतर संपूर्ण दिल्लीत हाय अलर्ट जारी करण्यात आला आहे. जम्मू-काश्मीर आणि दिल्ली यांच्यातील रणजी ट्रॉफी सामना दिल्लीतील अरुण जेटली क्रिकेट स्टेडियममध्ये खेळला जात आहे. लाल किल्ल्यापासून काही किलोमीटर अंतरावर असलेल्या स्टेडियममध्ये आणि त्याच्या आसपास सुरक्षा वाढवण्यात येईल.
दिल्ली आणि जिल्हा क्रिकेट असोसिएशनचे सचिव अशोक शर्मा यांनी सोमवारी पीटीआयला सांगितले की, दिल्ली आणि जम्मू-काश्मीर यांच्यातील रणजी ट्रॉफी सामन्याच्या अंतिम दिवशी अरुण जेटली स्टेडियम भोवती सुरक्षा वाढवण्यात येईल. “मी दिल्ली पोलिस अधिकाऱ्यांशी संपर्क साधेन आणि त्यांना स्टेडियमच्या बाहेर अतिरिक्त सुरक्षा तैनात करण्याची विनंती करेन,” असे ते म्हणाले.
पोलिसांनी कार मालकाला ताब्यात घेतले
दिल्ली पोलिसांनी सोमवारी संध्याकाळी लाल किल्ल्याजवळ झालेल्या स्फोटातील कारच्या मालकाला ताब्यात घेतले आहे, असे एका अधिकाऱ्याने सांगितले. या स्फोटात अनेक लोकांचा मृत्यू झाला आणि अनेक वाहने उद्ध्वस्त झाली. पोलिसांनी हरियाणातील गुरुग्राम येथील कार मालक मोहम्मद सलमानला ताब्यात घेतले आहे. अधिकाऱ्याने सांगितले की सलमानने त्याची कार ओखला येथील एका व्यक्तीला विकली होती. ही कार त्याच्या नावावर नोंदणीकृत होती आणि त्यावर हरियाणाचा नोंदणी क्रमांक होता.
एका वरिष्ठ पोलिस अधिकाऱ्याने सांगितले की, दिल्ली पोलिसांनी गुरुग्राम पोलिसांच्या सहकार्याने सोमवारी मोहम्मद सलमानला ताब्यात घेतले आणि त्याची कारबद्दल चौकशी केली जात आहे. त्याने ती कार ओखला येथील देवेंद्र नावाच्या व्यक्तीला विकली. नंतर, ती कार पुन्हा अंबाला येथील एखाद्याला विकण्यात आली आणि पोलिस त्या व्यक्तींचा शोध घेत आहेत. अधिकाऱ्याने सांगितले की, हा स्फोट तीन जणांना घेऊन जाणाऱ्या चालत्या हुंडई आय२० कारमध्ये झाला. जखमींच्या शरीरात आम्हाला कोणतेही श्रापनेल किंवा छिद्र आढळले नाहीत, जे बॉम्बस्फोटात असामान्य आहे. आम्ही सर्व पैलूंची चौकशी करत आहोत.
