सिडनी : पाच सामन्यांची कसोटी मालिका जिंकल्यानंतर बॉर्डर-गावसकर करंडक ऑस्ट्रेलियाला सोपवण्याचे निमंत्रण न मिळाल्याने भारताचे माजी कर्णधार सुनील गावसकर यांनी नाराजी व्यक्त केली आहे.
ही मालिका भारताचा महान फलंदाज व माजी कर्णधार सुनील गावसकर आणि ऑस्ट्रेलियाचे माजी महान खेळाडू ॲलन बॉर्डर यांच्या नावावर असल्याची माहिती आहे. ऑस्ट्रेलियाने सिडनी कसोटीत भारताचा सहा गडी राखून पराभव करून १० वर्षांनंतर बॉर्डर-गावसकर करंडक जिंकला आहे.
गावसकर यांनी व्यक्त केली निराशा
ऑस्ट्रेलियाच्या विजयानंतर अॅलन बॉर्डरने ट्रॉफी घरच्या संघाकडे सुपूर्द केली, पण स्वतः मैदानावर उपस्थित असलेल्या सुनील गावसकर यांना ट्रॉफी सादर करण्यासाठी बोलावण्यात आले नाही. गावसकर म्हणाले, ‘मला ट्रॉफी सादर करण्यासाठी आमंत्रित केले असते तर मला ते करायला आवडले असते. ही बॉर्डर-गावसकर ट्रॉफी आहे आणि ती भारत आणि ऑस्ट्रेलियाबद्दल आहे. म्हणजे मी मैदानावर हजर होतो. ऑस्ट्रेलिया जिंकला की नाही हे महत्त्वाचे नाही. ते जिंकले कारण त्यांनी चांगले क्रिकेट खेळले आणि ते योग्य आहे. हे फक्त मी भारतीय आहे म्हणून. माझा चांगला मित्र ॲलन बॉर्डरसोबत ट्रॉफी शेअर करताना मला आनंद झाला असता.’
प्रेक्षकांची मोठी गर्दी
भारत आणि ऑस्ट्रेलिया यांच्यातील कसोटी मालिका १९९६-९७ पासून बॉर्डर-गावसकर करंडक या नावाने खेळली जात आहे आणि दोघांमधील स्पर्धा ही कसोटी क्रिकेटमधील सर्वोच्च प्रतिस्पर्ध्यांपैकी एक आहे. सध्या सुरू असलेल्या बॉर्डर-गावसकर ट्रॉफीच्या पाच सामन्यांदरम्यान प्रत्येक मैदानावर प्रेक्षकांची प्रचंड गर्दी दिसून आली. गेल्या आठवड्यात मेलबर्न क्रिकेट मैदानावर प्रेक्षकांच्या उपस्थितीचा ८७ वर्ष जुना विक्रम मोडला गेला. पर्थमध्ये खेळली गेलेली पहिली कसोटी भारताने जिंकली, तर ऑस्ट्रेलियाने ॲडलेडमध्ये दिवस-रात्र कसोटी जिंकली. यानंतर ब्रिस्बेनमध्ये दोन्ही संघांमध्ये झालेला सामना अनिर्णित राहिला, तर मेलबर्न आणि सिडनीमध्ये ऑस्ट्रेलियाने पुन्हा विजय मिळवून बॉर्डर-गावसकर करंडकवर कब्जा केला.
