राष्ट्रीय शालेय सॉफ्टबॉल स्पर्धेचे जळगाव येथे शानदार उद्घाटन
जळगाव : खेळ भावना ही जीवनाची पाठशाळा आहे आणि ती आत्मसात करा असे प्रतिपादन राज्याचे पाणी पुरवठा व स्वच्छता मंत्री गुलाबराव पाटील यांनी येथे केले.
पाणीपुरवठा व स्वच्छता मंत्री गुलाबराव पाटील यांच्या हस्ते ६८ व्या राष्ट्रीय शालेय सॉफ्टबॉल क्रीडा स्पर्धेचा भव्य शुभारंभ जळगाव शहरात करण्यात आला. या स्पर्धेत २१ राज्यांतील ७०० खेळाडूंनी सहभाग घेतला आहे. त्यामुळे या स्पर्धेने राष्ट्रीय एकतेचे प्रतीक म्हणून ओळख मिळवली आहे.
उद्घाटनप्रसंगी मंत्री गुलाबराव पाटील म्हणाले की, ‘सॉफ़्टबॉलसारख्या स्पर्धा शारीरिक क्षमता, आत्मविश्वास आणि मानसिक समतोल वाढवण्यास मदत करतात. खेळ विद्यार्थ्यांना सामूहिकतेची भावना आणि अनुशासनाचे महत्त्व पटवून देतात. खेल भावना विद्यार्थ्यांसाठी जीवनाची पाठशाळा आहे. ती विद्यार्थ्यांना मेहनत, एकता, सहयोग आणि परस्पर आदर शिकवते, जे जीवनात यश मिळवण्यासाठी महत्त्वाचे असल्याचे प्रतिपादन मंत्री गुलाबराव पाटील यांनी केले.
मंत्री गुलाबराव पाटील यांनी विद्यार्थ्यांना प्रोत्साहन देत व खेळाडूंना शुभेच्छा दिल्या. आपल्या क्रीडाशक्तीला प्रकट करा आणि सकारात्मक बदल घडवा. मैत्रीपूर्ण स्पर्धेची भावना कायम ठेवा आणि आपल्या मेहनतीद्वारे समाज आणि राष्ट्रनिर्मितीत योगदान द्या असे आवाहन मंत्री पाटील यांनी यावेळी केले.
या स्पर्धेच्या आयोजनाबद्दल जळगाव शहराचे कौतुक करत त्यांनी सांगितले की, या स्पर्धेमुळे जळगावला राष्ट्रीय पातळीवर नवी ओळख मिळत आहे. क्रीडा ही आपल्या संस्कृतीचा महत्त्वाचा भाग असून ती राष्ट्रीय आणि सामाजिक बांधिलकीचा बोध देते.’
उद्घाटन प्रसंगी प्रमुख अतिथी म्हणून आमदार प्रा. चंद्रकांत सोनवणे, आमदार राजूमामा भोळे, पंजाबचे आमदार विनरजित सिंग, शिवछत्रपती राज्य क्रीडा पुरस्कार प्राप्त नारायणाप्पा खडके, शाम कोगटा, शिवछत्रपती राज्य क्रीडा पुरस्कार प्राप्त तथा सचिव डॉ. प्रदीप तळवेलकर, माजी नगरसेविका उज्वलाताई बेंडाळे, सॉफ्टबॉल महाराष्ट्राचे कार्याध्यक्ष पी. ई. तात्या पाटील, स्पर्धा निरीक्षक पदम सिंग कौंतेय यांच्यासह मान्यवर उपस्थित होते.
बहारदार सूत्रसंचालन आणि प्रास्ताविक जिल्हा क्रीडा अधिकारी रवींद्र नाईक यांनी केले. क्रीडा अधिकारी सचिन निकम यांनी आभार मानले.
