राष्ट्रीय टेनिस व्हॉलिबॉल स्पर्धेत महाराष्ट्र संघाचा दबदबा 

दोन सुवर्णपदकांची कमाई 

सेलू : उत्तर प्रदेश राज्यातील गाझीपूर येथे झालेल्या राष्ट्रीय टेनिस व्हॉलिबॉल स्पर्धेत महाराष्ट्र संघाने चमकदार कामगिरी बजावत दोन सुवर्ण, रौप्य, कांस्यपदक जिंकून स्पर्धा गाजवली. 

भारतीय टेनिस व्हॉलीबॉल महासंघाच्या वतीने गाझीपूर येथे या स्पर्धेचे आयोजन करण्यात आले होते. महाराष्ट्र संघाने सुवर्ण कामगिरी केली. यात सब ज्युनियर मुली व मिश्र दुहेरी गटात सुवर्णपदक तर ज्युनिअर मिश्र दुहेरीत रौप्यपदक आणि ज्युनिअर मुलींच्या गटात कांस्यपदक पटकावले.

सब ज्युनिअर मिश्र दुहेरीत महाराष्ट्राने सुवर्णपदक पटकावले. महाराष्ट्र संघाने अंतिम लढतीत उत्तर प्रदेश संघाचा २-० सेटमध्ये पराभव करुन सुवर्णपदक पटकावले. रणवीर भोसले (पुणे), सोनाक्षी कदम (पुणे) या खेळाडूंची कामगिरी निर्णायक ठरली. या संघाला प्रशिक्षक निनाद रहाटे (मुंबई उपनगर) यांचे मार्गदर्शन लाभले आहे. 

सब ज्युनिअर मुलींच्या गटात महाराष्ट्र संघाने सुवर्णपदक संपादन केले. अंतिम सामना महाराष्ट्र आणि झारखंड दरम्यान झाला. यात महाराष्ट्र संघाने २-० असा विजय साकारत सुवर्णपदक पटकावले. यात तनुजा रांजणे (पुणे), सृष्टी शिंदे, वैष्णवी  माने (सांगली), अवनी कांबळे (नाशिक), प्रांजल  सूर्यवंशी, चैताली चौधरी (जळगाव) या खेळाडूंची कामगिरी लक्षवेधक ठरली. या संघाला प्रशिक्षक मिलिंद कुलकर्णी यांचे मार्गदर्शन लाभले. 

ज्युनिअर मुलींच्या गटात महाराष्ट्र संघाला कांस्यपदकावर समाधान मानावे लागले. महाराष्ट्र आणि दिल्ली सामना झाला. यात चुरशीच्या सामन्यात महाराष्ट्र संघाने २-१ ने सामना जिंकून कांस्यपदक संपादन केले. यात मधुरा हवलदार, किर्ती सोळांकुरकर (सांगली), सुलशा  कपासी, श्रावणी वळंजू (मुंबई उपनगर) नीतू कंवर चौहान,(छत्रपती संभाजीनगर), गायत्री गायके (परभणी) या खेळाडूंची कामगिरी महत्त्वाची ठरली. या संघाला प्रशिक्षक मिलिंद कुलकर्णी (सांगली) यांचे मार्गदर्शन लाभले. 

मिश्र दुहेरी ज्युनिअर गटात महाराष्ट्राने रौप्यपदक मिळवले. अंतिम सामना हिमाचल प्रदेश आणि महाराष्ट्र असा झाला. यात हिमाचल प्रदेश संघाने महाराष्ट्र संघाचा २-० असा पराभव केला. हिमाचल प्रदेश संघाने सुवर्णपदक तर महाराष्ट्र संघाने रौप्यपदक पटकावले. यात सार्थक माळकर (परभणी), तपस्वी पगारे (नाशिक) या खेळाडूंची कामगिरी लक्षवेधक ठरली. या खेळाडूंना प्रशिक्षक निनाद रहाटे यांचे मार्गदर्शन लाभले. संघ व्यवस्थापक म्हणून अंकिता पाटील (जळगाव), अंबादास उंदरे, व्यंकटेश महाले (छत्रपती संभाजीनगर) यांनी काम पाहिले. 

ज्युनिअर मुलांच्या गटात महाराष्ट्र संघाने चौथा क्रमांक पटकावला. यात नील मयेकर (मुंबई उपनगर), मयूर बोरसे, प्रतीक बच्छाव (नाशिक), प्रसाद  महाले (परभणी), रोशन चव्हाण (जळगाव), पवन खांडगे (छत्रपती संभाजीनगर) या खेळाडूंनी चमकदार कामगिरी केली. 

सब ज्युनिअर मुलांच्या गटात महाराष्ट्र संघाने चौथा क्रमांक संपादन केला. यात विवेक सिंह, करण जाधव (ठाणे), आर्यन गायके (परभणी), गौरव चौधरी (मुंबई शहर), दत्तात्रय कळसकर, राज आळंजकर (छत्रपती संभाजीनगर) यांची कामगिरी लक्षवेधक ठरली. 

टेनिस व्हॉलिबॉल खेळाचे जनक डॉ व्यंकटेश वांगवाड, राज्य अध्यक्ष सुरेश रेड्डी क्यातमवार, राज्य सचिव गणेश माळवे, राज्य कार्याध्यक्ष डॉ आबासाहेब सिरसाठ, उपाध्यक्ष आनंद खरे, रामेश्वर कोरडे, किशोर चौधरी, राज्य कोषाध्यक्ष डॉ दिनेश शिगारम, जिल्हा सचिव सतीश नावाडे, प्रा नागेश कान्हेकर, विभागीय सचिव प्रमोद महाजन आदींनी अभिनंदन केले.