छत्रपती संभाजीनगर : जिल्हा क्रीडा अधिकारी कार्यालय आणि बजाजनगर सेवाभावी स्पोर्ट्स फाउंडेशन यांच्या संयुक्त विद्यमाने महाराष्ट्राचे भूमिपुत्र खाशाबा जाधव यांच्या जन्मशताब्दी निमित्त १४ व १५ जानेवारी रोजी भव्य कबड्डी स्पर्धेचे आयोजन बजाजनगर येथील इंद्रप्रस्थ जागृत हनुमान मंदिर बजाजनगर या ठिकाणी करण्यात आले आहे. ही स्पर्धा १४ व १७ वर्षांखालील मुले व मुली अशा दोन वयोगटात घेण्यात येणार आहे.
महाराष्ट्राला कुस्ती या खेळात पहिले वैयक्तिक पदक (कांस्य) मिळवून देणारे खाशाबा जाधव हे पहिले महाराष्ट्राचे भूमिपुत्र आहेत. महाराष्ट्र शासनाने १५ जानेवारी हा दिवस राज्य क्रीडा दिन म्हणून घोषित केला आहे. राज्य क्रीडा दिनाचे औचित्य साधून बजाजनगर सेवाभावी स्पोर्ट्स फाऊंडेशनच्या वतीने दरवर्षी राज्य क्रीडा दिन म्हणून विविध स्पर्धेचे आयोजन करून साजरा करण्यात येतो.
राज्य क्रीडा दिन साजरा करण्याचे बजाजनगर सेवाभावी स्पोर्ट्स फाऊंडेशनचे हे दुसरे वर्ष आहे. या स्पर्धेच्या उद्घाटन प्रसंगी जिल्हा क्रीडा अधिकारी बाजीराव देसाई, उद्योजक हनुमान भोंडवे, पोलिस निरीक्षक रामेश्वर गाढे, गजानन विद्यामंदिर अध्यक्ष आय जी जाधव, वेल डन कॉमर्स क्लासेसचे संचालक गोविंद गवळी, कैलास भोकरे, संकल्प शिक्षण संस्थेचे बी जी गायकवाड, गीते कोचिंग क्लासेसचे संचालक मिलिंद गीते यांची या प्रसंगी प्रमुख उपस्थिती राहणार आहे.
या स्पर्धेसाठी वाळूज पंचक्रोशीतील विविध शाळा आणि महाविद्यालयातील खेळाडू सहभागी होणार असून पंचक्रोशीतील जास्तीत जास्त खेळाडूंनी या स्पर्धेत सहभाग नोंदवावा असे आवाहन बजाजनगर सेवाभावी स्पोर्ट्स फाऊंडेशनचे अध्यक्ष प्रा. कैलास जाधव सचिव शेख, कोषाध्यक्ष सी के जाधव व संचालक मंडळ यांनी केले आहे. अधिक माहितीसाठी 9921835155 या क्रमांकावर संपर्क साधावा, असे आवाहन करण्यात आले आहे.
