टेंबा बवुमाची कर्णधारपदी निवड, तीन फिरकीपटूंचा समावेश
जोहान्सबर्ग : आगामी चॅम्पियन्स ट्रॉफी क्रिकेट स्पर्धेसाठी दक्षिण आफ्रिकेचा संघ जाहीर करण्यात आला आहे. हा संघ टेंबा बावुमा याच्या नेतृत्वाखाली स्पर्धेत खेळणार आहे. दुखापतीतून नुकतेच बरे झालेले वेगवान गोलंदाज लुंगी एनगिडी आणि अँरिक नोर्टजे यांचे संघात पुनरागमन झाले आहे. संघात तीन फिरकी गोलंदाज आणि पाच वेगवान गोलंदाज आहेत.
टेंबा बावुमा याच्या नेतृत्वाखाली दक्षिण आफ्रिकेच्या कसोटी संघाने जागतिक कसोटी अजिंक्यपद स्पर्धेच्या अंतिम फेरीत प्रवेश केला. अशा परिस्थितीत चॅम्पियन्स ट्रॉफीमध्येही त्याच्याकडून अशीच अपेक्षा आहे. दक्षिण आफ्रिकेला ऑस्ट्रेलिया, इंग्लंड आणि अफगाणिस्तानसह गट ब मध्ये स्थान देण्यात आले आहे.
नोर्टजे आणि एनगिडीचे संघात पुनरागमन
गेल्या महिन्यात नॉर्टजेला पायाला दुखापत झाली. त्यामुळे त्याला पाकिस्तानविरुद्धच्या एकदिवसीय मालिकेतून वगळण्यात आले. त्याच वेळी, गेल्या वर्षी नोव्हेंबरमध्ये मांडीच्या दुखापतीमुळे एनगिडी खेळत नव्हता. एनगिडी श्रीलंका आणि पाकिस्तानविरुद्धच्या एकदिवसीय मालिकेला मुकला. दक्षिण आफ्रिकेचा संघ २०२३ च्या एकदिवसीय विश्वचषकाच्या उपांत्य फेरीत पोहोचला. त्यावेळी संघाची कामगिरी उत्कृष्ट होती आणि त्यांना उपांत्य फेरीत ऑस्ट्रेलियाकडून पराभव पत्करावा लागला. त्या स्पर्धेतही टेम्बा बावुमा कर्णधार होता.
दक्षिण आफ्रिका संघ ब गटात
दक्षिण आफ्रिकेचा संघ २१ फेब्रुवारी रोजी कराची येथे अफगाणिस्तानविरुद्धच्या सामन्याने आपल्या मोहिमेची सुरुवात करेल. त्यानंतर आफ्रिकेचा संघ २५ फेब्रुवारी रोजी रावळपिंडी येथे ऑस्ट्रेलियाशी सामना करेल. दरम्यान, बावुमाचा संघ १ मार्च रोजी इंग्लंडविरुद्ध गटातील शेवटचा सामना खेळेल. वेगवान गोलंदाज जेराल्ड कोएत्झीला संघात स्थान देण्यात आलेले नाही. तो मांडीच्या दुखापतीने त्रस्त आहे. गेल्या वर्षी श्रीलंकेविरुद्धच्या डर्बन कसोटीत त्याला या समस्येचा सामना करावा लागला आणि त्यानंतर तो गकेबारा येथील दुसऱ्या कसोटीला आणि पाकिस्तानविरुद्धच्या संपूर्ण मालिकेला मुकला.
दक्षिण आफ्रिका तीन फिरकी गोलंदाज आणि पाच वेगवान गोलंदाज आहेत. याशिवाय जखमी वेगवान गोलंदाज नांद्रे बर्गरलाही संघात स्थान देण्यात आलेले नाही. दक्षिण आफ्रिकेच्या क्रिकेट बोर्डाने संघात शक्य तितके अष्टपैलू खेळाडू समाविष्ट करण्याचा प्रयत्न केला. म्हणूनच पुनर्वसन प्रक्रियेतून जात असलेल्या वियान मुल्डरचाही समावेश करण्यात आला आहे. श्रीलंकेविरुद्धच्या मालिकेदरम्यान त्याचे बोट मोडले. तथापि, तो पाकिस्तानविरुद्धच्या अलिकडच्या दुसऱ्या कसोटी सामन्यात खेळला. आता फिजिओने त्याला हिरवा कंदील दिला आहे. संघात केशव महाराज आणि तबरेज शम्सी हे दोन प्रमुख फिरकीपटू आहेत तर एडेन मार्कराम या दोघांना मदत करेल. त्याच वेळी, जलद गोलंदाजीची जबाबदारी जानसेन, एनगिडी, नोर्टजे, रबाडा आणि मुल्डर यांच्याकडे असेल.
दक्षिण आफ्रिकेचा संघ
टेम्बा बावुमा (कर्णधार), टोनी डी झोर्झी, मार्को जानसेन, हेनरिक क्लासेन, केशव महाराज, एडेन मार्कराम, डेव्हिड मिलर, वियान मुल्डर, लुंगी एनगिडी, अँरिक नोर्टजे, कागिसो रबाडा, रायन रिकेल्टन, तबरेज शम्सी, ट्रिस्टन स्टब्स, रुसी व्हॅन डर ड्यूसेन.
