भारताची नसरीन शेख सामन्यातील सर्वोत्तम खेळाडू
बाळासाहेब तोरसकर
नवी दिल्ली : इंदिरा गांधी इनडोअर स्टेडियममध्ये सुरू असलेल्या पहिल्या खो-खो विश्वचषक स्पर्धेत भारतीय महिला संघाने आपल्या मोहिमेची विजयी सुरुवात केली. मकर संक्रांतीच्या शुभ मुहूर्तावर खेळलेल्या या सामन्यात भारतीय महिलांनी दक्षिण कोरियाचा १५७ गुणांनी पराभव करत प्रेक्षकांना जल्लोषात सहभागी करून घेतले.
दक्षिण कोरियाच्या महिला संघाने सुरुवातीला जोरदार प्रयत्न केले आणि भारतीय महिलांच्या काही खेळाडूंना बाद करून प्रेक्षकांची दाद मिळवली. मात्र, अनुभवी भारतीय संघाने सामन्यावर पूर्ण वर्चस्व गाजवत गुणांचा वर्षाव केला. मध्यंतराला भारताने ९४-१० अशी आघाडी घेतली होती, जी अंतिम टप्प्यात १७५-१८ वर नेली. हा विजय केवळ दणदणीत नव्हता, तर गुणांच्या शतकाच्या पुढे जाऊन पावणे दोन शतक गाठणारा विक्रम ठरला.
ड्रीम रन संकल्पना
या विश्वचषकात ‘ड्रीम रन’ संकल्पना लागू असल्याने सामना संपूर्ण वेळ खेळवला जातो, जरी एका संघाचा विजय ठरलेला असला तरी. त्यामुळे भारतीय महिला संघाने संधीचा फायदा घेतला आणि गुणांची लयलूट करत आपली ताकद सिद्ध केली.
नसरीन शेख ठरली सामन्याची हिरो
भारतीय संघाची स्टार खेळाडू नसरीन शेख हिने अप्रतिम कामगिरी करत सामन्यातील सर्वोत्तम खेळाडूचा किताब पटकावला. तिच्या आक्रमक खेळाने आणि स्मार्ट रणनीतीने भारतीय संघाला मोठा विजय मिळवून दिला.
सांस्कृतिक उत्सवाचा माहोल
सामना संपल्यावर भारतीय समर्थकांनी ढोल-ताशांच्या गजरात जल्लोष केला. प्रेक्षकांनी संपूर्ण सामन्यात भारतीय संघाचे उत्साहवर्धन केले. मकर संक्रांतीच्या दिवशी मिळालेला हा मोठा विजय देशभरात खेळ प्रेमींसाठी आनंदाचा क्षण ठरला.
पुढील सामने आणि भारतीय संघाची तयारी या दमदार विजयानंतर भारतीय महिलांचा आत्मविश्वास उंचावला आहे. प्रशिक्षक आणि संघ व्यवस्थापकांनी पुढील सामन्यांसाठी रणनीतीवर काम सुरू केले आहे. भारतीय महिला संघ आता आपल्या विजयी लढतीला पुढे नेण्यास सज्ज आहे.
सामन्याचा निकाल
भारत : १७५ गुण विजयी विरुद्ध दक्षिण कोरिया : १८. भारताचा १५७ गुणांनी विजय.
