जळगाव : जळगाव येथे आयोजित राज्यस्तरीय शालेय डॉजबॉल स्पर्धेत मुलांच्या गटात नाशिक विभागाने तर मुलींच्या गटात पुणे विभागाने विजेतेपद पटकावले.
क्रीडा व युवक सेवा संचालनालय महाराष्ट्र राज्य, जिल्हा क्रीडा परिषद, जिल्हा क्रीडा अधिकारी कार्यालय व जळगाव जिल्हा डॉजबॉल असोसिएशन आयोजित राज्यस्तरीय शालेय डॉजबॉल स्पर्धा जिल्हा क्रीडा संकुल येथे घेण्यात आली.
या स्पर्धेत मुलांच्या गटात नाशिक विभाग प्रथम, मुंबई विभाग द्वितीय तर छत्रपती संभाजीनगर विभाग तृतीय स्थानी राहिला. मुलींच्या गटात पुणे विभाग प्रथम, मुंबई विभाग द्वितीय तर नाशिक विभागाने तृतीय स्थान पटकाविले.
या स्पर्धेचे पारितोषिक वितरण जिल्हा माहिती अधिकारी युवराज पाटील यांच्या हस्ते करण्यात आले. या प्रसंगी प्रमुख अतिथी म्हणून जिल्हा क्रीडा अधिकारी रवींद्र नाईक, महाराष्ट्र डॉजबॉल असोसिएशनचे सचिव प्राचार्य डॉ हनुमंत लुंगे, शिक्षण विस्तार अधिकारी तथा ग स सोसायटीचे संचालक विजय पवार, ग स सोसायटीचे अध्यक्ष अजबसिंग पाटील, सद्गुरू शिक्षण प्रसारक मंडळ संचलित बालविश्व विद्यालयाचे संचालक सौरभ चौधरी, राज्य क्रीडा मार्गदर्शक किशोर चौधरी, मीनल थोरात, महाराष्ट्र सेपक टकारो असोसिएशनचे सहसचिव प्रा इकबाल मिर्झा, जिल्हा डॉजबॉल असोसिएशनचे सचिव योगेश सोनवणे यांची उपस्थिती होती.
जिल्हा माहिती अधिकारी युवराज पाटील, जिल्हा क्रीडा अधिकारी रवींद्र नाईक यांनी विजयी संघांचे अभिनंदन केले. कार्यक्रमाचे सूत्रसंचालन व आभार प्रदर्शन जळगाव जिल्हा डॉजबॉल असोसिएशनचे अध्यक्ष राजेश जाधव यांनी केले. कार्यक्रमास राज्य क्रीडा मार्गदर्शक चंचल माळी, क्रीडा अधिकारी सचिन निकम, विशाल बोडके, भारत देशमुख यांची उपस्थिती होती.
या स्पर्धेत नाशिक, पुणे, मुंबई, कोल्हापूर, लातूर, छत्रपती संभाजीनगर व अमरावती विभागातील मुले व मुलींचे संघ सहभागी झाले होते.
