कसोटीच्या पहिल्याच दिवशी ३५ वे शतक आणि १० हजार धावांचा विक्रम
गॅले : ऑस्ट्रेलियाचा स्टार फलंदाज स्टीव्ह स्मिथने गुरुवारी भारताचे दिग्गज फलंदाज सुनील गावसकर यांना मागे टाकत ३५ व्या कसोटी शतकाचा विक्रम रचला. श्रीलंकेविरुद्ध सुरू असलेल्या गॉल कसोटीच्या पहिल्या दिवशी स्टँड-इन कर्णधार स्मिथने शानदार कामगिरी केली आणि १७९ चेंडूत आपले शतक पूर्ण केले. यासह त्याने एक मोठा विक्रम आपल्या नावावर केला. तो सर्वाधिक कसोटी शतके करणारा सातवा फलंदाज ठरला.
३५ वर्षीय स्मिथने आपल्या कारकिर्दीतील ३५ वे कसोटी शतक झळकावत भारताचा सुनील गावसकर, पाकिस्तानचा युनूस खान, वेस्ट इंडिजचा ब्रायन लारा आणि श्रीलंकेचा महेला जयवर्धने यांना मागे टाकले. या सर्व दिग्गजांच्या नावावर कसोटी क्रिकेटमध्ये ३४ शतके आहेत. या मालिकेत आणखी एका शतकासह स्टीव्ह स्मिथ माजी भारतीय फलंदाज राहुल द्रविड आणि इंग्लंडचा दिग्गज खेळाडू जो रूट यांची बरोबरी करू शकतो. दोघांनीही कसोटी क्रिकेटमध्ये ३६ शतके केली आहेत.
१० हजार धावा
स्मिथ १० हजार धावा पूर्ण करणारा दुसरा सर्वात जलद ऑस्ट्रेलियन फलंदाज ठरला.
या सामन्यात स्मिथने एकाच दिवसात दोन ऐतिहासिक कामगिरी केली आहे. बुधवारी त्याने कसोटी क्रिकेटमध्ये १० हजार धावा पूर्ण केल्या. तो कसोटीत १० हजार धावा पूर्ण करणारा चौथा ऑस्ट्रेलियन फलंदाज ठरला. ही कामगिरी सर्वात जलद करणारा स्मिथ दुसरा ऑस्ट्रेलियन फलंदाज आहे.
जगातील १५ वा फलंदाज
३५ वर्षीय स्मिथने कसोटी क्रिकेटमध्ये १० हजार धावा पूर्ण करणाऱ्या सचिन तेंडुलकर, रिकी पॉन्टिंग आणि ब्रायन लारा सारख्या दिग्गजांच्या यादीत स्थान मिळवले आहे. कसोटी इतिहासात १० हजार धावा पूर्ण करणारा स्मिथ हा जगातील १५ वा फलंदाज आहे. त्याच्या आधी, अ‍ॅलन बॉर्डर, स्टीव्ह वॉ आणि पॉन्टिंग हे ऑस्ट्रेलियन फलंदाज आहेत ज्यांनी ही कामगिरी केली आहे. स्मिथने ११५ कसोटी आणि २०५ डावांमध्ये ही कामगिरी केली. ब्रायन लारा, सचिन आणि कुमार संगकारा यांनी १९५ डावांमध्ये कसोटीत १० हजार धावा पूर्ण केल्या.
सर्वाधिक कसोटी शतके
स्मिथचा कसोटी प्रवास २०१० मध्ये पाकिस्तानविरुद्ध सुरू झाला. त्याचे पदार्पण संस्मरणीय नव्हते आणि त्याने दोन्ही डावांमध्ये एकत्रितपणे फक्त १३ धावा केल्या. तथापि, कालांतराने तो ऑस्ट्रेलियाच्या सर्वात यशस्वी फलंदाजांपैकी एक बनला आणि संघासाठी एक मजबूत मधल्या फळीतील फलंदाज म्हणून उदयास आला. त्याच्याकडे कसोटी स्वरूपात ३५ शतके आहेत आणि तो ऑस्ट्रेलियासाठी दुसऱ्या क्रमांकाचा सर्वाधिक कसोटी शतकवीर आहे. त्याच्यापेक्षा जास्त शतके फक्त रिकी पॉन्टिंगनेच केली आहेत, ज्यांनी कसोटीत ४१ शतके केली आहेत.
