नागपूर : नागपूर जिल्हा क्रीडा अधिकारी कार्यालयातर्फे राज्य युवा पुरस्कारासाठी अर्ज करण्याचे आवाहन जिल्हा क्रीडा अधिकारी पल्लवी धात्रक यांनी केले आहे.
राज्याच्या युवा धोरण अंतर्गत युवांच्या सामाजिक कार्याचा गौरव करण्यासाठी राज्य युवा पुरस्कार शासन निर्णय १२ नोव्हेंबर २०१३ नुसार राज्य युवा पुरस्कार देण्यात येतात. राष्ट्र व राज्य निर्माण मध्ये युवकांची महत्त्वपूर्ण भूमिका असून युवा वर्ग मोठ्या संख्येने राज्यात सामाजिक कार्य करीत आहे. युवांमध्ये असलेल्या सुप्त गुणांना वाव देणे, त्यांनी केलेल्या सामाजिक कार्यालया प्रोत्साहन देणे, त्यांचा गुणगौरव करणे हा या पुरस्कारा मागाचा मुख्य उद्देश असल्याचे जिल्हा क्रीडा अधिकारी पल्लवी धात्रक यांनी सांगितले.
सन २०२३-२४ या वर्षात राज्यस्तरावर राज्य युवा पुरस्कार क्रीडा विभागाच्या क्षेत्रिय विभागस्तर नुसार प्रत्येक विभागातील एक युवक, एक युवती व एक नोंदणीकृत संस्था यांना देण्यात येणार आहे. या पुरस्काराचे स्वरुप युवक-युवती ५० हजार रुपये, संस्थेस एक लाख रुपये तसेच गौरव पत्र व सन्मानचिन्ह असे आहे असे पल्लवी धात्रक यांनी सांगितले. इच्छुकांनी आपला अर्ज जिल्हा क्रीडा अधिकारी कार्यालयात १५ फेब्रुवारीपर्यंत सादर करणे आवश्यक आहे. अर्जाचा नमुना जिल्हा क्रीडा अधिकारी कार्यालय अथवा https://sports.maharashtra.gov.in या संकेतस्थावर उपलब्ध आहे. अधिक माहितीसाठी जिल्हा क्रीडा अधिकारी कार्यालयात संपर्क साधावा, असे आवाहन जिल्हा क्रीडा अधिकारी पल्लवी धात्रक यांनी केले आहे.
