बीसीसीआयतर्फे खेळाडूंचा गौरव
मुंबई : लक्ष विचलित करणाऱ्या गोष्टींपासून दूर राहा असा मोलाचा सल्ला भारताचा महान क्रिकेटपटू भारतरत्न सचिन तेंडुलकर याने भारतीय खेळाडूंना दिला आहे.
भारतीय क्रिकेट नियामक मंडळाच्या वार्षिक पुरस्कार वितरण समारंभात भारतीय संघाचा माजी महान फलंदाज सचिन तेंडुलकरने खेळाडूंना सल्ला दिला. सचिन म्हणाला की, ‘खेळाडूंनी त्यांच्या कारकिर्दीचा आनंद घ्यावा आणि लक्ष विचलित करणाऱ्या गोष्टींपासून दूर राहावे.’
मास्टर ब्लास्टर म्हणून प्रसिद्ध भारतरत्न सचिन तेंडुलकरला आयसीसी अध्यक्ष जय शाह यांच्या हस्ते कर्नल सी के नायडू जीवनगौरव या पुरस्काराने सन्मानित करण्यात आले.
या कार्यक्रमात अनेक भारतीय स्टार खेळाडूंव्यतिरिक्त काही तरुण खेळाडू देखील उपस्थित होते आणि सचिनने त्यांना महत्त्वाचा सल्ला दिला. भारतीय क्रिकेट बदलाच्या टप्प्यातून जात आहे, अशा परिस्थितीत सचिनने या तरुण खेळाडूंना सांगितले की त्यांना माहित आहे की क्रिकेटव्यतिरिक्त काही विचलित करणारे घटक आहेत. परंतु, त्यांना या गोष्टींपासून दूर राहून त्यांच्या कारकिर्दीवर लक्ष केंद्रित करावे लागेल.’
खेळाला महत्त्व द्या पुरस्कार स्वीकारल्यानंतर सचिन म्हणाला की, ‘नेहमी तुमच्या खेळाला महत्त्व द्या आणि तुमच्या खेळाची काळजी घ्या. त्या शेवटच्या दिवशी (२०१३) मला जाणवले की मी सध्याचा भारतीय क्रिकेटपटू म्हणून कधीही मैदानावर उतरू शकणार नाही. त्याचप्रमाणे, जेव्हा तुम्ही संन्यास घेता तेव्हा तुम्हाला कळेल की काही वर्षांपूर्वी तुम्ही कुठे होता. त्यामुळे तुमच्या खेळाचा आनंद घ्या. कारण सध्याच्या भारतीय क्रिकेटपटू म्हणून तुमच्यात अजूनही बरेच क्रिकेट शिल्लक आहे आणि लक्ष विचलित करणाऱ्या गोष्टींपासून दूर रहा.’
सचिन म्हणाला, ‘मी असे म्हणू शकतो की क्रिकेटशिवाय आपण सर्वजण आज या खोलीत बसलो नसतो. माझ्यासाठी ही जीवनाची एक मौल्यवान देणगी आहे. आपल्याकडे बॅट आणि बॉल आहे आणि जर आपल्याकडे मजबूत पकड नसेल तर ती सैल होईल. मी तुम्हाला लक्ष केंद्रित करण्याचा सल्ला देणार नाही, तर लक्ष विचलित करणाऱ्या गोष्टींपासून दूर राहण्याचा सल्ला देईन. आपल्याकडे सर्वकाही असू शकत नाही, म्हणून जेव्हा आपल्याला ते मिळते तेव्हा आपण त्याचे कौतुक केले पाहिजे आणि योग्य वर्तन केले पाहिजे आणि खेळ आणि देशाला पुढे नेले पाहिजे.’
बुमराह, मानधना आणि अश्विन यांचा सन्मान
सचिन व्यतिरिक्त, भारतीय वेगवान गोलंदाज जसप्रीत बुमराहला २०२३-२४ चा सर्वोत्तम पुरुष आंतरराष्ट्रीय क्रिकेटपटू म्हणून पॉली उम्रीगर पुरस्काराने सन्मानित करण्यात आले. ३१ वर्षीय बुमराह ऑस्ट्रेलियाविरुद्धच्या बॉर्डर-गावसकर ट्रॉफीमध्ये मालिकावीरही ठरला होता. त्याने पाच कसोटी सामन्यात ३२ बळी घेतले होते.
भारताची स्टार फलंदाज स्मृती मानधनाने महिला गटात २०२३-२४ चा सर्वोत्तम आंतरराष्ट्रीय क्रिकेटपटू पुरस्कार जिंकला. त्याच वेळी, गेल्या वर्षी डिसेंबरमध्ये आंतरराष्ट्रीय क्रिकेटमधून निवृत्ती घेतलेल्या अनुभवी फिरकी गोलंदाज रविचंद्रन अश्विनला कसोटी क्रिकेटमध्ये ५३७ बळींसह भारताचा दुसरा आणि जगातील आठवा सर्वोत्तम गोलंदाज म्हणून विशेष पुरस्काराने सन्मानित करण्यात आले.
पुरस्कार स्वीकारल्यानंतर अश्विन म्हणाला, ‘जेव्हा मी आयपीएलसाठी सराव करण्यासाठी मैदानावर गेलो तेव्हा मला जाणवले की गोलंदाजी करण्यासाठी माझ्या बोटांना अजूनही मुरगळ येत आहे. संपूर्ण कारकिर्द माझ्यासाठी एक मोठी कामगिरी होती आणि सचिन तेंडुलकरसोबत स्टेज शेअर करणे हा एक भाग्यवान अनुभव होता. चेन्नईमध्ये गल्ली क्रिकेट खेळणाऱ्या एका मुलासाठी हे स्वप्न पूर्ण झाले.’
बीसीसीआयच्या वार्षिक पुरस्कार सोहळ्यात २६ पुरस्कार देण्यात आले.
कर्नल सी के नायडू लाईफटाइम पुरस्कार : सचिन तेंडुलकर
सर्वोत्तम आंतरराष्ट्रीय पुरुष क्रिकेटपटू : जसप्रीत बुमराह
सर्वोत्तम आंतरराष्ट्रीय महिला क्रिकेटपटू : स्मृती मानधना
सर्वोत्तम आंतरराष्ट्रीय पदार्पण (पुरुष) : सरफराज खान
सर्वोत्कृष्ट आंतरराष्ट्रीय पदार्पण (महिला) : आशा शोभना
बीसीसीआय विशेष पुरस्कार : रविचंद्रन अश्विन
महिला एकदिवसीय सामन्यात सर्वाधिक धावा : स्मृती मानधना
महिला एकदिवसीय सामन्यांमध्ये सर्वाधिक विकेट्स : दीप्ती शर्मा
देशांतर्गत क्रिकेटमधील सर्वोत्तम पंच : अक्षय तोत्रे
१९ वर्षांखालील कूचबिहार ट्रॉफीमध्ये सर्वाधिक धावा : काव्या तोतिया
१९ वर्षांखालील कूचबिहार ट्रॉफीमध्ये सर्वाधिक विकेट्स : विष्णू भारद्वाज
महिला वरिष्ठ स्थानिक क्रिकेटमधील सर्वोत्तम क्रिकेटपटू : प्रिया मिश्रा
महिला ज्युनियर डोमेस्टिक क्रिकेटमधील सर्वोत्तम क्रिकेटपटू : ईश्वरी अवसरे
१६ वर्षांखालील विजय मर्चंट ट्रॉफी मध्ये सर्वाधिक विकेट : एच जगनाथन
१६ वर्षांखालील विजय मर्चंट ट्रॉफीमध्ये सर्वाधिक धावा : लक्ष्य रायचंदानी
२३ वर्षांखालील सीके नायडू ट्रॉफी (प्लेट ग्रुप) सर्वाधिक विकेट: न्झेखो रूपेरो
२३ वर्षांखालील सीके नायडू ट्रॉफी (प्लेट ग्रुप) सर्वाधिक धावा : हेम छेत्री
२३ वर्षांखालील सीके नायडू ट्रॉफी (एलिट ग्रुप) सर्वाधिक विकेट्स : पी विद्युत
२३ वर्षांखालील सीके नायडू ट्रॉफी (एलिट ग्रुप) सर्वाधिक धावा : अनिश केव्ही
रणजी ट्रॉफीमध्ये सर्वाधिक विकेट्स (प्लेट ग्रुप) : तनय त्यागराजन
रणजी ट्रॉफीमध्ये सर्वाधिक विकेट्स (एलिट ग्रुप) : आर साई किशोर
रणजी ट्रॉफीमध्ये सर्वाधिक धावा (प्लेट ग्रुप) : अग्नि चोप्रा
रणजी ट्रॉफीमध्ये सर्वाधिक धावा (एलिट ग्रुप) : रिकी भुई
देशांतर्गत मर्यादित षटकांच्या स्पर्धेतील सर्वोत्तम अष्टपैलू खेळाडू : शशांक सिंग
रणजी करंडकातील सर्वोत्तम आठ अष्टपैलू खेळाडू : तनुष कोटियन
बीसीसीआयच्या स्थानिक स्पर्धेत सर्वोत्तम कामगिरी : मुंबई
