सोलापूर : सोलापूर येथील संध्याराणी गणेशराज बंडगर हिची भारताच्या लॉन टेनिस संघात निवड झाली आहे.
टर्की येथे ९ ते १४ मार्च या कालावधीत होणाऱ्या आंतरराष्ट्रीय टेनिस फेडरेशनने आयोजित केलेल्या मास्टर वर्ल्ड टूर टीम चॅम्पियनशिप स्पर्धेत भारतातर्फे सहभागी होणाऱ्या ४० वर्षांपुढील वयोगटातील महिला संघात संध्याराणी बंडगर हिचा समावेश करण्यात आला आहे.
संध्याराणीने २०२४ मध्ये आंतरराष्ट्रीय टेनिस फेडरेशनने सोलापूर, झज्जर (हरियाणा) व इंदौर येथे आयोजित केलेल्या स्पर्धेत सहभाग नोंदवून विजेतेपद व उपविजेतेपद पटकावले होते. या यशामुळे व वैयक्तिक गुणात वाढ होऊन तिने या वयोगटात प्रथम मानांकन प्राप्त केले होते.
संध्याराणी या विभागीय वन अधिकारी सामाजिक वनीकरण खात्यात मुख्य लेखापाल पदावर कार्यरत असून त्यांना डीएफओ मनीषा पाटील यांचे सहकार्य तसेच महाराष्ट्र राज्य लॉन टेनिस संघटनेचे संयुक्त सचिव राजीव देसाई यांचे मार्गदर्शन लाभले. सुधीर सालगुडे हे त्यांचे प्रशिक्षक आहेत. त्यांच्या या निवडीबद्दल सोलापूर जिल्हा लॉन टेनिस संघटनेचे अध्यक्ष राजेश दमाणी तसेच संघटनेचे सहसचिव पंकज शहा, कोषाध्यक्ष दिलीप अत्रे व दिलीप बचुवार यांनी शुभेच्छा दिल्या.
