गौरव भटला सुवर्ण, नयन बारगजे, सिद्धी बेंडाळे, शिवानी भिलारेला रौप्यपदके
हल्दवानी : ३८ व्या राष्ट्रीय क्रीडा स्पर्धेत महाराष्ट्राने तायक्वांदो खेळात क्योरोगी प्रकारात गौरव भटला सुवर्ण, नयन बारगजे, सिद्धी बेंडाळे, शिवानी भिलारेला रौप्यपदके तर पुमसे प्रकारात मिश्र दुहेरीत सुवर्ण पदकासह दोन रौप्य आणि चार कांस्य पदकांची कमाई केली. पुमसे मध्ये वंश ठाकूर व मृणाली हर्नेकर जोडीने सुवर्ण पदकाला गवसणी घातली. राष्ट्रीय क्रीडा स्पर्धेत दोघांचे सलग दुसरे सुवर्णपदके आहेत. वैयक्तिक प्रकारात मृणालीने रौप्य, तर वंश याने कांस्यपदक जिंकले आहे. महाराष्ट्राने राष्ट्रीय क्रीडा स्पर्धेत एकूण १५ पदकांची कमाई केली आहे.
हल्दवानी येथे आंतरराष्ट्रीय क्रीडा संकुलात सुरू असलेल्या राष्ट्रीय क्रीडा स्पर्धेत ८७ किलो वरील वजन गटात गौरव भट याने सुवर्णपदक जिंकले. ४९ वजन गटात नयन बारगजे हिने अंतिम फेरीत धडक मारली. नयन बारगजे , शिवानी भिलारे, सिद्धी बेंडाळे यांनी ३ रौप्यपदके, तर साक्षी पाटील, अभिजित खोपडे, वसुंधरा छेडे, भारती मोरे, मनीषा गुत्तेदार, आयुष ओहोळ, श्रेया जाधव यांनीही कांस्य पदकांची लयलूट केली.
पुमसे दुहेरीमध्ये वसुंधरा छेडे आणि शिवम भिसले यांनी कांस्य पदक, मिश्र पूमसे प्रकारात वंश ठाकूर व मृणाली हर्नेकर यांनी अरुणाचल प्रदेशच्या जोडीवर रोमहर्षक मात करून सुवर्णपदक पटकावले. वैयक्तिक पूमसे प्रकारात मृणाली हर्नेकरने यश संपादन केले. अरुणाचल प्रदेश विरूद्ध महाराष्ट्राची लढत ८.२३२ गुणांवर बरोबरीत झाली. मात्र, अरुणाचलने प्रभावी प्रदर्शन केल्याने पाईंट १ गुणांनी महाराष्ट्राचा निसटता पराभव झाला.
५७ किलो गटातील उत्तराखंडच्या पूजा कुमारी या स्थानिक खेळाडूला प्रेक्षकांचा मोठा पाठिंबा मिळत होता, तरीही महाराष्ट्राच्या शिवानी भिलारे हिने शेवटपर्यंत कौतुकास्पद लढत दिली. अखेर शिवानी हिला रौप्य पदकावर समाधान मानावे लागले. शिवानी व पूजा यांच्यातील ५७ किलो गटाची लढत अतिशय रंगतदार झाली. दोन्ही खेळाडूंनी आपले सर्वस्व पणाला लावून ही लढत खेळली. त्यामुळे शेवटपर्यंत त्यामध्ये उत्सुकता राहिली होती. वजनी गटात साक्षी पाटील (४८ किलो) व अभिजित खोपडे (५४ किलो), तर वैयक्तिक पूमसे प्रकारात वंश ठाकूर व वसुंधरा छेडे या चौघांनीही उपांत्य फेरीपर्यंत मजल गाठताना सातत्यपूर्ण कामगिरी केली होती. उपांत्य फेरीत पराभूत झाल्यानंतर त्यांना ब्राँझपदक बहाल करण्यात आले.
शिवछत्रपती क्रीडा पुरस्कार विजेते प्रशिक्षक प्रवीण बोरसे, प्रवीण सोनकुल, अमोल तोडनकर, रॉबीन, शिवछत्रपती क्रीडा पुरस्कार विजेते लाला भिल्लारे, प्रमोद कदम यांनी प्रशिक्षक म्हणून काम पाहिले.
तायक्वांदो असोसिएशन ऑफ महाराष्ट्र मुंबई संघटनेचे अध्यक्ष डॉ अविनाश बारगजे, महासचिव मिलिंद पठारे, कोषाध्यक्ष व्यंकटेश्वर राव कररा, उपाध्यक्ष नीरज बोरसे, दुलिचंद मेश्राम, प्रवीण बोरसे, सचिव सुभाष पाटील, अजित घारगे, सतीश खेमसकर यांच्यासह सर्व जिल्हा पदाधिकारी, पंच, प्रशिक्षक यांनी पदक विजेत्या खेळाडूचे अभिनंदन केले आहे.
पदक विजेत्या खेळाडूंचा सत्कार !
राष्ट्रीय क्रीडा स्पर्धेत पदक विजेत्या सर्व खेळाडूचा व प्रशिक्षकांचा सत्कार सोहळा राज्य संघटनेच्या वतीने बालवाडी क्रीडा संकुलात १४ ते १६ फेब्रुवारी दरम्यान आयोजित राज्यस्तरीय ओपन स्पर्धेच्या निमित्ताने शनिवारी आयोजित करण्यात येणार आहे. याच वेळी सर्वोत्कृष्ट खेळाडू, सर्वोत्कृष्ट प्रशिक्षक पुरस्काराचे वितरण करण्यात येणार आहे.
