छत्रपती संभाजीनगर : छत्रपती संभाजीनगर बुद्धिबळ संघटना व टीआरएस फाऊंडेशन यांच्या संयुक्त विद्यमाने ९ वर्षांखालील मुले व मुली गटाची जिल्हा बुद्धिबळ निवड चाचणी स्पर्धा १६ फेब्रुवारी रोजी चेस लँड पाटोदा येथे आयोजित करण्यात आली आहे.
ही निवड चाचणी बुद्धिबळ स्पर्धा मुले व मुली अशा स्वतंत्र गटात होणार आहे. या निवड चाचणी स्पर्धेतून ९ वर्षीय मुले व मुली यांचा प्रत्येकी २-२ खेळाडूंचा संघ निवडण्यात येणार आहे. या स्पर्धेतून निवडण्यात येणारा संघ हा आगामी राज्य अजिंक्यपद स्पर्धेत छत्रपती संभाजीनगर जिल्ह्याचे प्रतिनिधित्व करणार आहे.
या स्पर्धेतून पुढे राज्य, राष्ट्रीय व एशियन गेम्स स्पर्धेमध्ये सहभागी होण्याची संधी प्राप्त होते. त्यामुळे या संधीचा पुरेपूर वापर करावा व जास्तीत जास्त संख्येने जिल्ह्यातील बुद्धिबळ खेळाडूंनी आपला सहभाग नोंदवावा, असे आवाहन जिल्हा बुद्धिबळ संघटना सचिव हेमेंद्र पटेल व टी आर एस फाऊंडेशनच्या सचिव महिला आंतरराष्ट्रीय मास्टर तेजस्विनी सागर, राष्ट्रीय प्रशिक्षक अंजली सागर यांनी केले आहे.
सहभागी खेळाडूंनी १६ फेब्रुवारी रोजी सकाळी १० वाजता आपली उपस्थिती नोंद करणे आवश्यक आहे. ही स्पर्धा फिडे नियमांतर्गत स्विस लीग पद्धतीने घेण्यात येईल. विजेत्यांना मेडल दिले जातील. सहभागी स्पर्धकांना प्रमाणपत्र प्रदान करण्यात येणार आहे. खेळाडूंनी आपापले चेस सेट व चेस क्लॉक आणून सहकार्य करावे.असे आयोजकांकडून कळविण्यात आले आहे.
खेळाडूंनी नाव नोंदणी १५ फेब्रुवारीपर्यंत करावी. ऐनवेळेस प्रवेश स्वीकारला जाणार नाही. अधिक माहितीसाठी जिल्हा बुद्धिबळ संघटनेचे सचिव हेमेंद्र पटेल यांच्याशी संपर्क साधावा असे आवाहन करण्यात आले आहे.
