जामनेर आंतरराष्ट्रीय कुस्ती युद्धासाठी सज्ज

पृथ्वीराज आणि शिवराज पुन्हा एकाच मैदानात उतरणार

देवाभाऊ केसरी आंतरराष्ट्रीय स्पर्धेच्या निमित्ताने जामनेरमध्ये दिग्गजांच्या लढती

जळगाव : जळगाव जिल्ह्यातील जामनेर तालुक्यात येत्या १६ फेब्रुवारीला आंतरराष्ट्रीय कुस्तीयुद्ध रंगणार आहे. ‘शरीर तंदुरुस्त, खेळच सर्वोत्तम’ हा संदेश देत ‘नमो कुस्ती महाकुंभ २’ मध्ये देवाभाऊ केसरी आंतरराष्ट्रीय कुस्ती स्पर्धेच्या निमित्ताने महाराष्ट्र केसरी पृथ्वीराज मोहोळ, उपमहाराष्ट्र केसरी महेंद्र गायकवाड, शिवराज राक्षेसह भारतातील नामवंत पैलवान आंतरराष्ट्रीय पैलवानांशी भिडण्यासाठी सज्ज झाले आहेत. त्यामुळे पुन्हा एकदा जामनेर शहर कुस्तीच्या महाकुंभात थराराची एक डुबकी मारण्यासाठी कुस्तीप्रेमींचा जनसागर उसळणार असून, या दंगलसाठी मुख्यमंत्री देवेंद्र फडणवीस, ऑलिम्पिक विजेता रवी कुमार दिया, ऑलिम्पियन नरसिंग यादव, कॉमनवेल्थ विजेता राहुल आवारे यांची प्रमुख उपस्थिती राहणार आहे.
 
जलसंपदा मंत्री गिरीष महाजन यांच्या संकल्पनेतून देवाभाऊ केसरीच्या निमित्ताने रंगणार्‍या कुस्तीत ‘मुख्यमंत्री माझी लाडकी बहीण’चा नारा देत ५० लाडक्या ‘पैलवान’ बहिणींच्या कुस्त्याही खेळविणार आहेत. एवढेच नव्हे तर या कुस्तीयुद्धाचा प्रारंभ आणि समारोप महिला कुस्तीनेच केला जाणार आहे. कुस्तीच्या इतिहासात महिला कुस्तीपटूंना असा सन्मान प्रथमच दिला जात असल्याची स्फूर्तिदायक माहिती संयोजक समितीचे प्रमुख हिंदकेसरी रोहित पाटील यांनी दिली. महिला कुस्तीला प्राधान्य दिल्यामुळे ट्रिपल महाराष्ट्र केसरी भाग्यश्री कोळी एस्टोनियाच्या युरोपियन चॅम्पियन मार्टा पाजूलाशी भिडेल. तसेच महिला महाराष्ट्र केसरी अमृता पुजारीची गाठ रोमानियन ऑलिम्पियन कॅटालिना क्सेंटशी पडेल. अशाच महिलांच्या अनेक रोमहर्षक लढतींचे आयोजन या महाकुंभात केले जाणार आहे.

या स्पर्धेच्या निमित्ताने ९ देशांचे नामांकित मल्ल जामनेर गाठणार असून या महाकुंभाचे विशेष आकर्षण म्हणजे महाराष्ट्र केसरी पृथ्वीराज मोहोळ इराणच्या जलाल म्हजोयूबशी पंगा घेणार आहे तर उपमहाराष्ट्र केसरी महेंद्र गायकवाड रोमानियाचा युरोपियन विजेता फ्लोरिन ट्रिपोनशी लढणार आहे. त्याचप्रमाणे महाराष्ट्र केसरीत पराभवामुळे पेटून उठलेला शिवराज राक्षेही आपली ताकद दाखवण्यासाठी जामनेर गाठणार आहे. 

ट्रिपल महाराष्ट्र केसरी विजय चौधरीसह अनेक महाराष्ट्र केसरी आणि उपमहाराष्ट्र केसरी आंतरराष्ट्रीय पैलवानांना धोबीपछाड देण्यासाठी मैदानात उतरण्यासाठी जोरदार तयारी करत आहेत. भारतासह फ्रान्स, मोल्दोवा, उझबेकिस्तान, रोमानिया, एस्टोनिया, इराण, ब्राझील आणि जॉर्जिया या देशांचे ऑलिम्पियन, जागतिक विजेते, अर्जुन पुरस्कार विजेते, हिंद केसरी, रुस्तुम ए हिंद, भारत केसरी, महाराष्ट्र केसरी आणि उप-महाराष्ट्र केसरी असे नामांकित पैलवान सहभागी होणार आहेत. स्पर्धेत प्रमुख २२ लढतींसह ३०० पैलवानांच्याही कुस्त्या लावल्या जाणार आहेत.

प्रथमच आंतरराष्ट्रीय मल्लांचा कुस्ती महामुकाबला
या महामुकाबल्याचे खास वैशिष्ट्य म्हणजे भारताच्या कुस्ती इतिहासात प्रथमच तब्बल ९ देशांचे नामवंत महिला आणि पुरुष मल्ल एकाच मंचावर भिडणार आहेत. भारत, फ्रान्स, मोल्दोवा, उझबेकिस्तान, रोमानिया, एस्टोनिया, इराण, ब्राझील आणि जॉर्जिया या देशाचे ऑलिम्पियन, जागतिक विजेते, अर्जुन पुरस्कार विजेते, हिंद केसरी, रुस्तुम ए हिंद, भारत केसरी, महाराष्ट्र केसरी आणि उप-महाराष्ट्र केसरी असे नामांकित पैलवान सहभागी होणार आहेत.

स्पर्धेत सहभागी खेळाडूंवर बक्षीसांचा अक्षरश: वर्षाव होणार असून विजेत्यांना रोख पारितोषिकांसह मानाची गदा आणि ‘देवाभाऊ केसरी’ हा प्रतिष्ठेचा किताब प्रदान केला जाणार आहे, अशी माहिती संयोजक हिंदकेसरी रोहित पटेल यांनी दिली. ही स्पर्धा रविवार, १६ फेब्रुवारी रोजी सकाळी ११ वाजता सुरू होऊन संध्याकाळी ८ वाजेपर्यंत चालणार आहे. महाराष्ट्राच्या कुस्ती परंपरेला जागत, या ऐतिहासिक कुस्ती दंगलीचा साक्षीदार होण्यासाठी क्रीडाप्रेमींनी मोठ्या संख्येने उपस्थित राहावे, असे आवाहन आयोजक मंत्री गिरीश महाजन यांनी केले आहे.

स्पर्धेतील प्रमुख लढती

ट्रिपल महिला महाराष्ट्र केसरी भाग्यश्री कोळी विरुद्ध युरोपियन चॅम्पियन मार्टा पाजूला (एस्टोनिया), प्रतीक्षा बांगडी (पहिली महिला महाराष्ट्र केसरी) विरुद्ध अंजलीक गोन्झालेझ (वर्ल्ड चॅम्पियन-फ्रान्स), शिवराज राक्षे (डबल महाराष्ट्र केसरी) विरुद्ध गुलहिर्मो लिमा (वर्ल्ड चॅम्पियन), अमृता पुजारी (महिला महाराष्ट्र केसरी) विरुद्ध कॅटालिना क्सेन्टन ऑलिॉम्पियन – रोमानिया), सिकंदर शेख (महाराष्ट्र केसरी) विरुद्ध घेओघे एरहाण (युरोप चॅम्पियन – मोल्दोवा), पृथ्वीराज मोहोळ (महाराष्ट्र केसरी) विरुद्ध जलाल म्हजोयूब ( आशियाई पदक विजेता – इराण), हर्षवर्धन सदगीर (महाराष्ट्र केसरी) विरुद्ध इमामुक (वर्ल्ड चॅम्पियन – जॉर्जिया), सुमित मलिक (अर्जुन पुरस्कार, ऑलिम्पियन) विरुद्ध जस्सा (शेर ए पंजाब), पृथ्वीराज पाटील (महाराष्ट्र केसरी) विरुद्ध जॉन्टी गुज्जर (आंतरराष्ट्रीय विजेता – दिल्ली), वेताळ शेळके (भवानी केसरी – महाराष्ट्र) विरुद्ध दिनेश गोलिया (आंतरराष्ट्रीय विजेता- हरियाणा), फ्लोरिन ट्रिपोन (युरोप चॅम्पियन – रोमानिया) विरुद्ध महेंद्र गायकवाड (उपमहाराष्ट्र केसरी), भूपिन्दर सिंह (भारत केसरी – पंजाब) विरुद्ध युधिष्ठिर दिल्ली (राष्ट्रीय विजेता-हरियाणा), कमलजित धूमछडी (रुस्तुम ए हिंद – पंजाब) विरुद्ध विक्रांत कुमार (राष्ट्रीय विजेता – हरियाणा), सतेंदर मलिक (भारत केसरी – हरियाणा) विरुद्ध योगेश पवार (उप महाराष्ट्र केसरी), बाला रफिक शेख (महाराष्ट्र केसरी) विरुद्ध सोनू (हिमाचल केसरी- हरियाणा), हरियाणा माउली जमदाडे (महान भारत केसरी) विरुद्ध मनजीत खत्री (भारत केसरी-हरियाणा), शिवा चव्हाण (राष्ट्रीय विजेता – महाराष्ट्र) विरुद्ध रजत मंडोथी (त्रिमूर्ती केसरी – हरियाणा), मुन्ना झुंजुर्के (महाराष्ट्र चॅम्पियन) विरुद्ध हरिओमी ट्रॅक्टर (राष्ट्रीय विजेता- दिल्ली), बाळू बोडके (महाराष्ट्र चॅम्पियन) विरुद्ध मनजीत मेला (राष्ट्रीय विजेता- हरियाणा), वेदांतिका पवार (उपमहाराष्ट्र केसरी) विरुद्ध शिवानी मेटकर (राष्ट्रीय विजेती), अपेक्षा पाटील (राष्ट्रीय विजेती) विरुद्ध सोनाली मंडलिक (राष्ट्रीय विजेती).