छत्रपती संभाजीनगर : महाराष्ट्र शासनाच्या क्रीडा विभागाद्वारा राज्यातील सर्वोत्कृष्ट क्रीडापटूंना व क्रीडा क्षेत्रात उल्लेखनीय कार्य करणा-या व्यक्तींना क्रीडा विभागाचा प्रतिष्ठेचा शिवछत्रपती राज्य क्रीडा पुरस्कार प्रदान करण्यात येतो. या पुरस्कारासाठी क्रीडा विभागाकडून सूचना व हरकती मागवण्यात आल्या आहेत.
क्रीडा क्षेत्रात विशेष उल्लेखनीय कार्य करणाऱ्या ज्येष्ठ क्रीडा महर्षिकरीता जीवन गौरव पुरस्कार, क्रीडा मार्गदर्शकांकरीता उत्कृष्ट क्रीडा मार्गदर्शक आणि शिवछत्रपती राज्य क्रीडा पुरस्कार (खेळाडू), शिवछत्रपती राज्य क्रीडा पुरस्कार (साहसी उपक्रम), शिवछत्रपती राज्य क्रीडा पुरस्कार (दिव्यांग खेळाडू) व जिजामाता राज्य क्रीडा पुरस्कार (महिला क्रीडा मार्गदर्शक), असे पुरस्कार प्रदान करण्यात येतात.
शासनाने २९ डिसेंबर २०२३ व २५ जानेवारी २०२४ नुसार शिवछत्रपती राज्य क्रीडा पुरस्कार सुधारीत नियमावली २०२३ विहित केली आहे. या नियमावलीनुसार सन २०२३-२४ या वर्षाच्या पुरस्कारासाठी राज्यातील क्रीडा मार्गदर्शक, खेळाडू, दिव्यांग खेळाडू व साहसी उपक्रमात सहभागी झालेले खेळाडू/व्यक्ती यांच्याद्वारा १४ जानेवारी ते २६ जानेवारी २०२५ या कालावधीत ऑनलाईन पद्धतीने प्राप्त झालेल्या अर्जाची प्राथमिक छाननी करण्यात आली आहे. प्राथमिक छाननीचे गुणांकन तक्ते शासन निर्णय क्रमांक २९ डिसेंबर २०२३ मधील नियम क्रं.१.१९, नियम क्रं.१.२०, नियम क्रं.१.२१ अन्वये एकूण गुणांकनासह १५ ते १८ फेब्रुवारी २०२५ या कालावधीत सूचना व हरकतीसाठी https://shivchhatrapatiawards.com या लिंकवर प्रसिध्द करण्यात येत आहेत.
प्राथमिक छाननी अहवाल हे अंतिम नसून त्यामध्ये आपल्या सूचना व हरकतींनुसार बदल होऊ शकतो, तसेच सूचना/ हरकतीनंतर सदरचा अहवाल पुनश्च्य प्रसिद्ध करण्यात येणार नाही. प्राथमिक छाननी अहवालात केलेल्‍या पुरस्कार गुणांकनाबाबत काही आक्षेप किंवा सूचना असतील तर त्या सोबत जोडलेल्या विहित नमून्यात सादर कराव्यात.
पुरस्कारासाठी ऑनलाईन सूचना व हरकती सादर करण्याची अंतिम मुदत दिनांक १८ फेब्रुवारी आहे. पुरस्कार गुणांकन तक्ते अवलोकनासाठी व सूचना/ हरकती सादर करण्यासाठी ऑनलाईन लिंक: https://shivchhatrapatiawards.com यावर ऑनलाईन अर्ज सादर करण्यात यावे असे क्रीडा व युवक सेवा संचालनालय, महाराष्ट्र राज्य, पुणे व या कार्यालयाच्या वतीने आवाहन करण्यात येत आहे.
