मुस्लिम युनायटेड संघावर २४ धावांनी विजय
मुंबई : धावांचा पाऊस पडलेल्या थरारक सामन्यात इस्लाम जिमखान्याने मुस्लिम युनायटेड संघावर २४ धावांनी विजय मिळवत सालार जंग टी २० क्रिकेट स्पर्धेच्या उपांत्य फेरीत प्रवेश केला.
इस्लाम जिमखाना मैदानावर खेळल्या गेलेल्या या सामन्यात मुस्लिम युनायटेड संघाने नाणेफेक जिंकून इस्लाम जिमखाना संघाला प्रथम फलंदाजीसाठी आमंत्रित केले. प्रतिस्पर्ध्यांच्या या निर्णयाचा पुरेपूर फायदा घेत इस्लाम जिमखाना संघाने २० षटकांत ४ बाद २२१ धावांचा डोंगर उभारला.
अयाज खानचा तडाखेबंद खेळ
इस्लाम जिमखान्याच्या डावाची सुरुवात दमदार झाली. प्रणव शेट्टी (४३) आणि सुफियान शेख (३८) यांनी संघाला चांगली गती दिली. त्यानंतर अयाज खानने ३२ चेंडूत ८ चौकार आणि ३ षटकारांसह नाबाद ६५ धावा फटकावत संघाला भक्कम स्थितीत नेले. सुजीत नायक (१३) आणि विनायक घोत्रे (२३) यांनीही चांगले योगदान दिले.
मुस्लिम युनायटेड संघाकडून दीपक शेट्टी (१-३१), ध्रुविल मतकर (१-२८) आणि सौद मन्सुरी (१-३७) यांनी प्रत्येकी एक विकेट घेतली.
मुस्लिम युनायटेडची लढत अपुरी पडली
२२२ धावांचा पाठलाग करताना मुस्लिम युनायटेड संघाची सुरुवात खराब झाली. मात्र, रोहन भाटकर (४६) आणि मोईन खान (६६) यांनी जोरदार प्रतिकार केला. मात्र, मधली फळी ढासळल्याने संघाचा डाव १९.४ षटकांत १९७ धावांवर आटोपला.
इस्लाम जिमखाना संघाकडून सिद्धार्थ राऊत (३-३२) आणि सर्फराज पाटील (३-३२) यांनी महत्त्वपूर्ण विकेट घेतल्या. त्यांना हितेश कदम (१-३४) आणि सुजित नायक (१-२३) यांनी चांगली साथ दिली.
या विजयासह इस्लाम जिमखाना संघाने उपांत्य फेरीत धडक मारली असून, आता पुढील सामन्यात त्यांच्याकडून दमदार कामगिरीची अपेक्षा आहे.
