छत्रपती संभाजीनगर-पूना क्लब सामना अनिर्णित
पुणे : महाराष्ट्र क्रिकेट संघटनेतर्फे आयोजित सीनियर निमंत्रित क्रिकेट लीग स्पर्धेत छत्रपती संभाजीनगर संघाने पहिल्या डावात पूना क्लब संघाविरुद्ध ८३ धावांची आघाडी घेत बाजी मारली. या सामन्यात छत्रपती संभाजीनगरच्या सागर पवार याने धमाकेदार नाबाद २५१ धावांची खेळी करत संघाला सामन्यावर वर्चस्व मिळवून दिले.
कटारिया हायस्कूल मैदानावर हा सामना झाला. पूना क्लब संघाने नाणेफेक जिंकून प्रथम गोलंदाजी करण्याचा निर्णय घेतला. छत्रपती संभाजीनगर संघाने प्रथम फलंदाजी करताना ८८ षटकात नऊ बाद ३५२ अशी भक्कम धावसंख्या उभारुन डाव घोषित केला. त्यानंतर पूना क्लबने ८२.२ षटकात सर्वबाद २६९ धावा काढल्या. हा सामना अनिर्णित राहिला. यात छत्रपती संभाजीनगर संघाने पहिल्या डावात महत्त्वपूर्ण ८३ धावांची आघाडी घेतली.
या सामन्यात छत्रपती संभाजीनगरच्या सागर पवार याने २६६ चेंडूंचा सामना करत नाबाद २५१ धावांची तुफानी द्विशतकी खेळी केली. सागर याने तब्बल आठ उत्तुंग षटकार व ३० चौकार ठोकले. अभिनव पुरी याने १७० चेंडूत ९४ धावांची बहारदार खेळी साकारली. त्याने एक षटकार व १३ चौकार मारले. सुरज गोंड याने सात चौकारांसह ३६ धावांचे योगदान दिले. गोलंदाजीत धनराज परदेशी (४-६७), ऋषिकेश नायर (४-६०), सौरभ पवार (३-९७) यांनी प्रभावी कामगिरी बजावली.
संक्षिप्त धावफलक : छत्रपती संभाजीनगर : पहिला डाव : ८८ षटकात नऊ बाद ३५२ डाव घोषित (सागर पवार नाबाद २५१, स्वप्नील चव्हाण १८, सुरज गोंड ३६, योगेश चव्हाण १०, हर्षवर्धन पवार नाबाद ११, धनराज परदेशी ४-६७, सौरभ पवार ३-९७, सुरज राय १-५१, शुभम कोठारी १-८०).
पूना क्लब : पहिला डाव : ८२.२ षटकात सर्वबाद २६९ (अर्जुन वाघ २२, अथर्व काळे ३४, अभिनव पुरी ९४, ऋषभ राठोड २५, रिशी नाले १८, भार्गव पाठक २४, सूरज राय १७, सौरभ पवार नाबाद १०, ऋषिकेश नायर ४-६०, सूरज गोंड २-३०, आनंद ठेंगे १-२२, योगेश चव्हाण १-६१, श्रीनिवास लेहेकर १-२५, स्वप्नील चव्हाण १-३४).
