राज्य अजिंक्यपद कबड्डी स्पर्धेचा रोमांचक थरार
मनमाड, नाशिक : ३५व्या किशोर आणि किशोरी गट राज्य अजिंक्यपद निवड चाचणी कबड्डी स्पर्धेत उपांत्यपूर्व फेरीत ठाणे ग्रामीण, जालना आणि कोल्हापूर संघांनी आपला विजय मिळवून राज्य अजिंक्यपदाच्या मार्गावर आपली कारकीर्द कायम ठेवली. ही स्पर्धा नाशिक जिल्हा कबड्डी असोसिएशनच्या विद्यमाने मनमाडच्या माणकचंद ललवाणी इस्टेट (हेलिपॅड) मैदानावर खेळली जात आहे.
पिंपरी चिंचवडने पालघरला ४९-३४ असे पराभूत करत उपांत्यपूर्व फेरीत स्थान मिळवले. पहिल्या डावात चुरशीच्या लढतीत पिंपरी चिंचवडने २४-१५ अशी आघाडी घेतली. दुसऱ्या डावात आणखी दोन लोण देत सहज विजय मिळवला. मनीष काळजे आणि विजय राठोड यांच्या झंझावाती चढायांनी या विजयाला बळ दिले. पालघरच्या मंथन पाटील आणि ध्रुव डोंगरे यांनी चांगली लढत दिली, तरीही विजय त्यांच्याकडून दूरच राहिला.
ठाणे ग्रामीणचा जबरदस्त विजय
ठाणे ग्रामीणने धाराशिव संघाला ६०-४५ असे पराभूत करत उपांत्यपूर्व फेरी गाठली. ठाण्याच्या निखिल गायकर आणि विवेक चोरगे यांच्या दमदार खेळामुळे ठाण्याला विजय मिळवण्यात यश आले. धाराशिवच्या विश्वनाथ सुपेकरने एकाकी लढा दिला, पण तोपर्यंत उशीर झाला.
जालनाचा धडाकेबाज विजय
जालना संघाने जळगाव संघाला ५९-२० असे नमवत उपांत्यपूर्व फेरीत प्रवेश केला. विश्रांतीच्या वेळी जालनाकडे ३२-०८ अशी मोठी आघाडी होती. तुकाराम दिवटे आणि रितेश आढे यांच्या तुफानी चढायांनी जळगावला संधीच दिली नाही.
कोल्हापूरची विजयी घोडदौड कायम
कोल्हापूर संघाने छत्रपती संभाजीनगर संघाला ४१-२८ असे हरवून आपली विजयी घोडदौड कायम ठेवली. कोल्हापूरच्या हर्षवर्धन पाटील, प्रशांत अकिगे आणि समर्थ ढोंबरे यांच्या सामर्थ्यवान खेळामुळे या संघाला विजय मिळवता आला. छत्रपती संभाजीनगरच्या अजित चव्हाण आणि देवेंद्र निकम यांचे संघर्षशील प्रदर्शन देखील लक्ष वेधून घेत होते.
बाद फेरी गाठणारे संघ
अ गट : पिंपरी चिंचवड, अहिल्यानगर. ब गट : नंदुरबार, जळगाव, क गट : कोल्हापूर, पुणे शहर. ड गट : सांगली, धाराशिव, इ गट : ठाणे ग्रामीण, रत्नागिरी. फ गट : परभणी, छत्रपती संभाजीनगर. ग गट : जालना, नांदेड. ह गट : मुंबई उपनगर पश्चिम, पालघर.
