लिजंड्स प्रीमियर लीग क्रिकेट ः अमान शेख सामनावीर
छत्रपती संभाजीनगर ः लिजंड्स प्रीमियर लीग टी २० क्रिकेट स्पर्धेत दुसऱया सामन्यात डीएफसी श्रावणी संघाने रोहन रॉयल्स संघावर ७० धावांनी विजय मिळवला. या सामन्यात अमान शेख याने सामनावीर किताब संपादन केला.
एमआयटी क्रिकेट स्टेडियमवर ही स्पर्धा होत आहे. डीएफसी श्रावणी संघाने नाणेफेक जिंकून प्रथम फलंदाजी करत २० षटकात आठ बाद १९४ अशी भक्कम धावसंख्या उभारुन सामन्यावर वर्चस्व गाजवले. या धावसंख्येचा पाठलाग करताना रोहन रॉयल्स संघ १५.४ षटकात १२४ धावांवर सर्वबाद झाला.
डीएफसी श्रावणी संघाच्या अमान शेख याने अवघ्या २९ चेंडूत ६१ धावांची तुफानी खेळी करत सामना एकतर्फी बनवला. त्याने षटकारांचा पाऊस पाडत तब्बल सात षटकार ठोकले. दोन चौकार देखील त्याने मारले. रोहन राठोड याने २६ चेंडूत ३६ धावांची वेगवान खेळी साकारली. रोहनने एक षटकार व सहा चौकार मारले. सम्राट गुटे याने एक षटकार व तीन चौकारांसह २० चेंडूत २७ धावांचे योगदान दिले. गोलंदाजीत अमान शेख याने ३६ धावांत चार विकेट घेत अष्टपैलू योगदान दिले. निलेश गवई याने १४ धावांत दोन गडी बाद केले. विनोद यादव याने ३१ धावांत दोन बळी घेतले.
संक्षिप्त धावफलक ः डीएफसी श्रावणी ः २० षटकात आठ बाद १९४ (दादासाहेब ७, अशोक शिंदे १६, पंकज १५, सिद्ध जैन २२, नितीन भुईगळ २६, अमान शेख नाबाद ६१, इशांत राय नाबाद २१, इतर २१, राजेंद्र चोपडा २-२८, रोहन राठोड २-२५, विनोद यादव २-३१, सम्राट गुटे १-२६, मयूर जंगाळे १-३९) विजयी विरुद्ध रोहन रॉयल्स ः १५.४ षटकात सर्वबाद १२४ (रोहन राठोड ३६, रोहन शाह ११, सम्राट गुटे २७, मयूर जंगाळे ६, राजेंद्र चोपडा १२, संदीप सानप १२, अमान शेख ४-३६, इशांत राय २-२४, निलेश गवई २-१४, तनवीर राजपूत १-२१, बाळासाहेब मगर १-८). सामनावीर ः अमान शेख.
