विदर्भ संघ तिसऱ्यांदा रणजी करंडक चॅम्पियन 

पहिल्या डावातील आघाडीवर केरळ संघाला हरवले, दानिश मालेवार सामनावीर, हर्ष दुबे मालिकावीर  

सतीश भालेराव 

नागपूर ः विदर्भ संघाने अंतिम सामन्यात वर्चस्व गाजवत केरळ संघाला हरवून रणजी करंडक जिंकला आहे. नागपूर येथे झालेला विदर्भ आणि केरळ यांच्यातील रणजी फायनल अनिर्णित राहिला. पहिल्या डावातील आघाडीच्या आधारे विदर्भ संघाने केरळ संघाचा पराभव केला. त्यामुळे विदर्भ संघाने तिसऱ्यांदा रणजी करंडक जिंकला आहे. 

विदर्भ संघाने यापूर्वी २०१७-१८ आणि २०१८-१९ मध्ये रणजी विजेतेपद पटकावले होते. गेल्या काही वर्षांत विदर्भाचे हे तिसरे जेतेपद आहे. विदर्भ संघाने पहिल्या डावात दानिश मालेवारच्या १५३ धावा आणि करुण नायरच्या ८६ धावांच्या मदतीने ३७९ धावा केल्या, परंतु कर्णधार सचिन बेबीच्या ९८ धावा असूनही केरळ संघाने पहिल्या डावात ३४२ धावा केल्या. अशाप्रकारे विदर्भाने पहिल्या डावात ३७ धावांची आघाडी मिळवली. विदर्भाकडून दुसऱ्या डावात करुण नायरने शतक झळकावले आणि १३५ धावांची खेळी केली. दरम्यान, दर्शन नळकांडे यांनी नाबाद ५१ धावा केल्या. दिवसाचा खेळ संपला तेव्हा विदर्भाने दुसऱ्या डावात नऊ बाद ३७५ धावा केल्या होत्या. नळकांडेने अर्धशतक झळकावताच सामना संपल्याचे घोषित करण्यात आले.

विदर्भाचा दुसरा डाव
विदर्भ संघाने शेवटच्या पाचव्या दिवशी चार बाद २४९ धावांवर पुढे खेळण्यास सुरुवात केली. करुण नायरने १३२ धावांवर आणि कर्णधार अक्षय वाडकरने चार धावांवर खेळण्यास सुरुवात केली. तथापि, करुणला त्याच्या धावसंख्येत फक्त तीन धावा जोडता आल्या आणि आदित्य सरवटेने त्याला पॅव्हेलियनमध्ये पाठवले. त्यानंतर काही वेळातच एडन अ‍ॅपलने हर्ष दुबेला बाद केले, जो चार धावा करून बाद झाला होता. त्यानंतर सरवटेने आदित्य (२५) ला बाद करून विदर्भाला सातवा बळी मिळवून दिला.

अक्षय कर्णेवार आणि नळकांडे यांनी आठव्या विकेटसाठी ४८ धावांची भागीदारी करत विदर्भाला ३०० धावांचा टप्पा ओलांडून दिला. मात्र, कर्णेवार ७० चेंडूत ३० धावा काढून बाद झाला आणि त्यानंतर सरवटेने नचिकेत भुते (३) ला बाद केले आणि विदर्भाला नऊ विकेट गमावून सोडले. शेवटी, नळकांडे वगळता यश ठाकूर आठ धावा करून नाबाद राहिला. केरळकडून सरवटेने चार, तर निधेश, जलज सक्सेना, अ‍ॅपल, बेसिल आणि अक्षय चंद्रन यांनी प्रत्येकी एक विकेट घेतली.

विदर्भ संघाने तिसऱ्यांदा रणजी करंडक जिंकला आहे. यापूर्वी, विदर्भ संघाने २०१७-१८ आणि २०१८-१९ मध्ये हे विजेतेपद जिंकले होते. त्यांनी २०१७ मध्ये दिल्ली संघाला आणि २०१८ मध्ये सौराष्ट्र संघाला हरवले होते. त्याच वेळी, विदर्भ संघ २०२३-२४ मध्ये उपविजेता होता. त्यावेळी अंतिम सामन्यात मुंबई संघाने विदर्भ संघाला अंतिम सामन्यात हरवले होते. केरळ क्रिकेट संघ पहिल्यांदाच अंतिम फेरीत पोहोचला होता. यंदा उपांत्य फेरीत विदर्भाने मुंबईचा, तर केरळने गुजरातचा पराभव केला होता.

बीसीसीआयचे अध्यक्ष रॉजर बिन्नी यांच्या हस्ते विदर्भ संघाचा कर्णधार अक्षय वाडकर याने रणजी करंडक स्वीकारला. विदर्भ संघाचा दानिश मालेवार हा सामनावीर तर हर्ष दुबे हा मालिकावीर पुरस्काराचा मानकरी ठरला. 

स्वप्न खरे ठरले ः अक्षय वाडकर 
रणजी ट्रॉफी संघाचे माझे व संघाचे स्वप्न प्रत्यक्षात आले याचा मोठा आनंद आहे. सर्व जण आनंदी आहेत. यंदाच्या हंगामासाठी आम्ही पावसाळ्यापासून तयारी सुरू केली. सर्वांनी त्यांच्या कौशल्यांवर आणि तंदुरुस्तीवर काम केले. आमचे फलंदाज व गोलंदाज टॉप चार किंवा पाचमध्ये आहेत. यश राठोड, दानिश मालेवार हे महत्त्वपूर्ण खेळी करण्यास सक्षम आहेत. संघ अडचणीत असताना त्यांनी मानसिक कणखरता दाखवली व त्यांची क्षमता सिद्ध केली. एक खेळाडू म्हणून आणि कर्णधार म्हणून तुम्ही जेव्हा रणजी ट्रॉफी खेळत असता तेव्हा रणजी विजेतेपद जिंकणे नेहमीच स्वप्न असते. हे स्वप्न प्रत्यक्षात साकारले याचा मोठा आनंद मला व माझ्या संघाला आहे. आम्ही सर्व पैलूंवर लक्ष केंद्रित केले आहे. ऑफ-सिझनमध्ये ॉआमच्या उणीवांवर काम करण्याची गरज आहे, असे विदर्भ संघाचा कर्णधार अक्षय वाडकर याने रणजी करंडक जिंकल्यानंतर सांगितले.