लाईफलाइन-मासिआ औद्योगिक क्रिकेट ः सागर पवार सामनावीर
छत्रपती संभाजीनगर ः लाईफलाइन-मासिआ औद्योगिक टी २० लीग क्रिकेट स्पर्धेत शहर पोलिस संघाने डॉक्टर्स इलेव्हन संघावर सहा विकेट राखून दणदणीत विजय नोंदवत आगेकूच केली. या लढतीत सागर पवार याने सामनावीर किताब संपादन केला.
गरवारे क्रिकेट स्टेडियमवर ही स्पर्धा होत आहे. शहर पोलिस संघाने नाणेफेक जिंकून प्रथम गोलंदाजी करण्याचा निर्णय घेतला. शहर पोलिस संघाच्या गोलंदाजांनी डॉक्टर्स इलेव्हनला १९.५ षटकात अवघ्या १२४ धावांत रोखून कर्णधाराचा निर्णय योग्य ठरवला. त्यानंतर शहर पोलिस संघाने या धावसंख्येचा पाठलाग करताना ११.३ षटकात चार बाद १२८ धावा फटकावत सहा गडी राखून सामना जिंकला.
या सामन्यात शहर पोलिस संघाच्या सागर पवार याने अवघ्या ४१ चेंडूत नाबाद ८८ धावांची वादळी खेळी केली. सागरने धमाकेदार अर्धशतकी खेळीत पाच उत्तुंग षटकार व ११ चौकार ठोकले. आर्यन शेजुळ याने २० चेंडूत ३० धावांची आक्रमक खेळी केली. त्याने एक षटकार व तीन चौकार मारले. सम्राट गुटे याने तीन चौकारांसह २२ धावा फटकावल्या. गोलंदाजीत आर्यन शेजुळ याने १५ धावांत तीन विकेट घेत अष्टपैलू ठसा उमटवला. जिलानी शेख याने १४ धावांत दोन आणि डॉ संदीप सानप याने १५ धावांत दोन गडी बाद केले.
संक्षिप्त धावफलक ः डॉक्टर्स इलेव्हन ः १९.५ षटकात नऊ बाद १२४ (डॉ सुनील काळे ११, डॉ कार्तिक बाकलीवाल ७, आकाश डुकले १२, सम्राट गुटे २२, राजेश चौधरी ८, डॉ संदीप सानप नाबाद २०, राजेंद्र चोपडा १६, इतर १८, आर्यन शेजुळ ३-१५, जिलानी शेख २-१४, ओंकार मोगल १-१३, डॉ रणजीत पाटील १-२४, सागर पवार १-१४) पराभूत विरुद्ध शहर पोलिस ः ११.३ षटकात चार बाद १२८ (सागर पवार नाबाद ८८, आर्यन शेजुळ ३०, ओंकार मोगल नाबाद २, डॉ संदीप सानप २-१५, राजेंद्र चोपडा १-२७). सामनावीर ः सागर पवार.
