श्वेता माने, यशोदा घोगरेची चमकदार कामगिरी
पुणे ः महाराष्ट्र क्रिकेट संघटनेतर्फे आयोजित एमसीए सीनियर महिला एकदिवसीय क्रिकेट स्पर्धेत छत्रपती संभाजीनगर महिला संघाने वॉरियर्स महिला संघावर सहा विकेट राखून दणदणीत विजय नोंदवत आगेकूच केली. यशोदा घोगरे ही सामनावीर पुरस्काराची मानकरी ठरली.
विराग क्रिकेट मैदानावर हा सामना झाला. वॉरियर्स महिला संघाने नाणेफेक जिंकून प्रथम फलंदाजी करण्याचा निर्णय घेतला. छत्रपती संभाजीनगर महिला संघाने प्रभावी गोलंदाजी करत वॉरियर्स महिला संघाला अवघ्या ९२ धावांवर रोखत सामन्यावर वर्चस्व मिळवले. त्यानंतर छत्रपती संभाजीनगर महिला संघाने अवघ्या ११.२ षटकात चार बाद ९७ धावा फटकावत सहा विकेट राखून सामना जिंकला.
या सामन्यात छत्रपती संभाजीनगर संघाच्या श्वेता माने हिने अवघ्या १६ चेंडूत ३० धावांची धमाकेदार खेळी केली. श्वेताने एक षटकार व चार चौकार मारले. जिया सिंग हिने १८ चेंडूत सहा चौकारांसह २७ धावांची आक्रमक खेळी साकारली. वॉरियर्स संघाकडून आर्या घोलप हिने पाच चौकारांसह ३० धावांची खेळी केली. गोलंदाजीत भूमिका चव्हाण हिने १३ धावांत तीन विकेट घेत आपला ठसा उमटवला. यशोदा घोगरे हिने २८ धावांत तीन गडी टिपत संघाच्या विजयात मोलाचा वाटा उचलला. आदिती वाघमारे हिने ३२ धावांत तीन गडी बाद केले.
संक्षिप्त धावफलक ः वॉरियर्स महिला संघ ः ४०.१ षटकात सर्वबाद ९२ (स्वामिनी जेजुरकर १२, श्रावणी जामदार ७, सई चव्हाण २५, आर्या घोलप ३०, य़शोदा घोगरे ३-२८, भूमिका चव्हाण ३-१३, मुक्ता मगरे २-१४, अक्षरा डांगे १-१७) पराभूत विरुद्ध छत्रपती संभाजीनगर महिला संघ ः ११.२ षटकात चार बाद ९७ (जिया सिंग २७, माधुरी आघाव १६, श्वेता माने नाबाद ३०, मुक्ता मगरे ८, भूमिका चव्हाण नाबाद ५, आदिती वाघमारे ३-३२, कृतिका चौधरी १-२१). सामनावीर ः यशोदा घोगरे.
