छत्रपती संभाजीनगर महिला संघाचा विक्रमी विजय 

अक्षरा डांगे, यशोदा घोगरेची चमकदार कामगिरी 

पुणे ः महाराष्ट्र क्रिकेट संघटनेतर्फे आयोजित एमसीए सीनियर महिला एकदिवसीय निमंत्रित लीग क्रिकेट स्पर्धेत छत्रपती संभाजीनगर महिला संघाने पीवायसी महिला संघावर दहा विकेट राखून दणदणीत विजय मिळवला. छत्रपती संभाजीनगर संघाने अवघ्या ३.१ षटकात हा विजय मिळवला हे विशेष. आतापर्यंत या स्पर्धेत झालेल्या सामन्यात हा सर्वात कमी षटकात नोंदवला गेलेला विजय ठरला आहे. 

गॅरी कर्स्टन क्रिकेट अकादमी मैदानावर हा सामना झाला. पीवायसी महिला संघाने नाणेफेक जिंकून प्रथम फलंदाजी स्वीकारली. मात्र, पीवायसी संघाला हा निर्णय महागात पडला. पीवायसी संघ २२.४ षटकात अवघ्या ३३ धावांत सर्वबाद झाला. त्यानंतर छत्रपती संभाजीनगर महिला संघाने अवघ्या ३.१ षटकात बिनबाद ३४ धावा फटकावत दहा विकेट राखून सामना जिंकला. 

या सामन्यात जिया सिंग हिने ११ चेंडूत नाबाद १९ धावा फटकावल्या. तिने चार चौकार मारले. कर्णधार मुक्ता मगरे हिने आठ चेंडूत नाबाद ११ धावा काढल्या. तिने दोन चौकार मारले. निधी वेलणकर हिने दोन चौकारांसह ११ धावांचे योगदान दिले. गोलंदाजीत अक्षरा डांगे हिने तीन धावांत तीन विकेट घेऊन आपला ठसा उमटवला. दिव्या जाधव हिने १० धावांत दोन गडी बाद केले. यशोदा घोगरे हिने आठ धावांत दोन बळी टिपले. 

संक्षिप्त धावफलक ः पीवायसी महिला संघ ः २२.४ षटकात सर्वबाद ३३ (निधी वेलणकर ११, रिती परमार ४, इतर १२, अक्षरा डांगे ३-३, यशोदा घोगरे २-८, दिव्या जाधव २-१०, मुक्ता मगरे १-३, भूमिका चव्हाण १-३) पराभूत विरुद्ध छत्रपती संभाजीनगर महिला संघ ः ३.१ षटकात बिनबाद ३४ (मुक्ता मगरे नाबाद ११, जिया सिंग नाबाद १९). सामनावीर ः यशोदा घोगरे.