मुंबई ः विलेपार्ले मधील दोन मल्लखांब खेळाडू जान्हवी जाधव व रिषभ घुबडे या दोघांनी उत्तराखंड येथे नुकत्याच झालेल्या ३८ व्या राष्ट्रीय क्रीडा स्पर्धेत मोलाची कामगिरी केली आहे. प्रबोधनकार ठाकरे क्रीडा संकुलाचे अध्यक्ष आणि मल्लखांब संघ अंधेरीचे अध्यक्ष अरविंद प्रभू यांनी या दोन्ही विजेत्या मल्लखांब खेळाडूंची भेट घेतली व त्यांचे कौतुक केले.
या प्रसंगी सुनील वालावकर यांची उपस्थिती होती. वर्ल्ड चॅम्पियन जान्हवी जाधव हिने दोरी मल्लखांब साधन प्रकारात सुवर्ण पदक, सांघिक रौप्य पदक व पुरलेला मल्लखांब साधन प्रकारात कांस्य पदक पटकाविले. रिषभ घुबडे याने दोरी मल्लखांब साधन प्रकारात सुवर्ण पदक, सांघिक रौप्य पदक व वैयक्तिक विजेतेपद स्पर्धेत कांस्य पदक अशी प्रत्येकी तीन पदके जिंकली.
अशा कठीण स्पर्धेत पदके मिळवणे खूपच कौतुकास्पद आहे. या दोघांचे प्रशिक्षक मल्लखांब खेळातील द्रोणाचार्य पुरस्कार विजेते गणेश देवरुखकर यांचा खूप मोलाचा वाटा आहे तसेच आंतरराष्ट्रीय पंच इशा देवरुखकर व वरिष्ठ प्रशिक्षक महेश अटाळे यांचे मार्गदर्शन सुद्धा तितकेच महत्त्वाचे आहे. अरविंद प्रभू यांनी या विजेत्या खेळाडूंचे अभिनंदन केले.
