छत्रपती संभाजीनगर ः महाराष्ट्राच्या फिडे मास्टर आकाश दळवी याने पहिली जी एच रायसोनी मेमोरियल छत्रपती संभाजीनगर फिडे रॅपिड रेटिंग बुद्धिबळ स्पर्धेत विजेतेपद पटकावले.
ही स्पर्धा छत्रपती संभाजीनगर येथे जी एच रायसोनी स्पोर्ट्स आणि कल्चरल फाउंडेशन तसेच कल्पना प्रकाश वेलफेअर फाउंडेशन यांच्या संयुक्त विद्यमाने आणि छत्रपती संभाजीनगर जिल्हा बुद्धिबळ संघटनेच्या सहकार्याने हिमालय पब्लिक स्कूल येथे आयोजित करण्यात आली होती. महाराष्ट्र बुद्धिबळ संघटना, अखिल भारतीय बुद्धिबळ महासंघ आणि फिडे यांनी या स्पर्धेला मान्यता दिली होती.
या स्पर्धेमध्ये देशभरातून ३२४ खेळाडूंनी सहभाग घेतला होता. त्यामध्ये आंतरराष्ट्रीय मास्टर कुशाग्र मोहन आणि आयएम रवी तेजा यांचाही समावेश होता. फिडे मास्टर आकाश दळवी याने ९ पैकी ८.५ गुण मिळवून विजेतेपद पटकावत ५० हजार रुपयांचे रोख बक्षीस आणि चमकदार ट्रॉफी जिंकली.
तेलंगणाच्या अव्वल मानांकित आंतरराष्ट्रीय मास्टर कुशाग्र मोहन याने ८ गुण मिळवत उपविजेतेपद पटकावले. फिडे मास्टर गौरांग बागवे (महाराष्ट्र) याने ८ गुण मिळवत तिसरे स्थान मिळवले. सुयोग वाघ, वेदांत पिंपळखरे, वेदांत पानेसर, प्रियांशू पाटील आणि वैभव राऊत यांनी ७.५ गुण मिळवले आणि टाय-ब्रेक स्कोअरनुसार अनुक्रमे चौथ्या ते आठव्या स्थानावर राहिले.
बक्षीस वितरण सोहळा
मुख्य अतिथी जीएसटीचे सेवानिृत्त सहाय्यक आयुक्त अरविंद ढोबळे यांच्या हस्ते विजेत्यांना पारितोषिकांचे वितरण करण्यात आले. यावेळी विशेष अतिथी म्हणून क्रॉम्प्टन ग्रीव्हज लिमिटेडचे जनरल मॅनेजर दिलीप वाकोडे, महाराष्ट्र बुद्धिबळ संघटनेचे सहसचिव हेमेंद्र पटेल, कल्पना प्रकाश वेलफेअर फाउंडेशनचे सचिव भूषण श्रीवास आदी मान्यवर उपस्थित होते.
स्पर्धेचे मुख्य पंच अजिंक्य पिंगळे (मुंबई) हे होते. अमरिश जोशी हे उपमुख्य पंच होते. तसेच सागर साखरे, सतीश ठाकूर, अमित टेंभुर्णे, विलास राजपूत, प्रयास अंबाडे, शिशिर इंदूरकर, कृष्णा ठाकूर, केतकी देशमुख, प्रथमेश मचावे, पुष्कर डोंगरे आणि अभिजित वैष्णव यांनी पंच म्हणून काम पाहिले.
