दुबई ः चॅम्पियन्स ट्रॉफी क्रिकेट स्पर्धेचे यजमानपद पाकिस्तानकडे आहे. मात्र, चॅम्पियन्स ट्रॉफी स्पर्धेचा अंतिम सामना रविवारी दुबई येथे भारत आणि न्यूझीलंड यांच्यात रंगणार आहे. हायब्रीड मॉडेल स्वीकारल्यामुळे पाकिस्तान क्रिकेट बोर्डासमोर मोठा लाजीरवाणा प्रसंग उद्भवला आहे. यजमान देश असूनही अंतिम सामना दुसऱ्या देशात खेळवण्याची वेळ पाकिस्तानवर आली आहे.
पाकिस्तानसाठी अपमानित होणे हे काही नवीन नाही. कुठेतरी, कधी ना कधी त्याचा आदर तुटतो. आता क्रिकेटच्या मैदानावर तेच घडेल. मोठ्या कष्टाने, जवळजवळ २९ वर्षांनंतर पाकिस्तानला आयसीसी स्पर्धेचे आयोजन करण्याची संधी मिळाली, ती देखील अर्धवट वाटली. क्रिकेट जगतातील सर्वात मोठा सामना भारत विरुद्ध पाकिस्तान दुबईमध्ये खेळला गेला आणि त्यानंतर सर्वात मोठा सामना भारत विरुद्ध ऑस्ट्रेलिया हा देखील पाकिस्तानमध्ये होऊ शकला नाही. आता या स्पर्धेचा अंतिम सामना दुबईत होत आहे. भारतीय संघाने अंतिम फेरी गाठून पाकिस्तानकडून चॅम्पियन्स ट्रॉफी स्पर्धेचे यजमानपद हिरावून घेतल्यासारखी परिस्थिती निर्माण झाली आहे. याची पाकिस्तान क्रिकेट बोर्डाने कधी अपेक्षा केली नसणार आणि नेमके तेच घडले.
खरं तर, आयसीसीने चॅम्पियन्स ट्रॉफीचे वेळापत्रक जाहीर केले तेव्हा त्यांनी स्पष्ट केले होते की भारताचा उपांत्य सामना दुबईमध्ये होईल आणि जर भारतीय संघ चॅम्पियन्स ट्रॉफीच्या अंतिम फेरीत पोहोचला तर जेतेपदाचा सामना देखील दुबईमध्ये होईल. भारतीय संघाने अंतिम फेरी गाठली नसती तर अंतिम सामना लाहोर येथे होणार होता. कोट्यवधी रुपये खर्चुन पाकिस्तान क्रिकेट बोर्डाने क्रिकेट स्टेडियमचे नूतनीकरण करून घेतले. परंतु, सर्व चर्चा भारतीय संघाच्या कामगिरी भोवती फिरत राहिल्याने या स्पर्धेचे यजमान असल्याचा आनंद पाकिस्तान क्रिकेट बोर्डाला काही घेता आला नाही.
