कपिलदेव, सौरव गांगुली यांना मागे टाकत रोहित धोनीच्या खास क्लबमध्ये सामील
दुबई ः भारतीय संघाचा कर्णधार रोहित शर्मा याने न्यूझीलंडविरुद्धच्या चॅम्पियन्स ट्रॉफी स्पर्धेतील विजेतेपदासह माजी कर्णधार महेंद्रसिंग धोनीची बरोबरी केली आहे. दुबई येथे खेळल्या गेलेल्या अंतिम सामन्यात भारताने न्यूझीलंडला चार विकेट्सने हरवले आणि १२ वर्षांनी चॅम्पियन्स ट्रॉफीचे विजेतेपद पटकावले. न्यूझीलंडने भारतासमोर विजयासाठी २५२ धावांचे लक्ष्य ठेवले होते, जे भारताने एक षटक शिल्लक असताना पूर्ण केले.
दुसरे आयसीसी जेतेपद
या जेतेपदाच्या विजयासह रोहित भारतासाठी एकापेक्षा जास्त आयसीसी ट्रॉफी जिंकणारा दुसरा कर्णधार बनला आहे. रोहितच्या नेतृत्वाखाली भारताने गेल्या वर्षी टी २० विश्वचषक जिंकला होता. महेंद्रसिंग धोनीच्या नेतृत्वाखाली भारताला सर्वाधिक आयसीसी विजेतेपद मिळवून देण्याचा विक्रम आहे. धोनीने तीन आयसीसी ट्रॉफी जिंकल्या आहेत. धोनीच्या नेतृत्वाखाली भारताने २००७ चा टी २० विश्वचषक, २०११ चा एकदिवसीय विश्वचषक आणि २०१३ चा चॅम्पियन्स ट्रॉफी जिंकली होती. त्याच वेळी सौरव गांगुली आणि कपिल देव यांच्या नेतृत्वाखाली भारताने प्रत्येकी एक आयसीसी जेतेपद जिंकले आहे. चॅम्पियन्स ट्रॉफी जिंकणारा रोहित हा तिसरा भारतीय कर्णधार आहे.
भारताने सातवी आयसीसी ट्रॉफी जिंकली
नाणेफेक जिंकून प्रथम फलंदाजी केल्यानंतर न्यूझीलंडने ५० षटकांत सात विकेट्स गमावून २५१ धावा केल्या. प्रत्युत्तरात भारताने ४९ षटकांत सहा गडी गमावून लक्ष्य गाठले. रोहितने कर्णधारपदाची खेळी खेळली. त्याने ७६ धावा करून भारताला संकटातून बाहेर काढले. ही भारताची सातवी आयसीसी ट्रॉफी आहे. यापूर्वी, संघाने १९८३ आणि २०११ चा एकदिवसीय विश्वचषक, २००७ आणि २०२४ चा टी-२० विश्वचषक आणि २००२, २०१३ आणि २०२५ चा चॅम्पियन्स ट्रॉफी जिंकला आहे. संपूर्ण स्पर्धेत भारत अपराजित राहिला आहे. भारताने सलग पाच सामने जिंकले.
