फिटनेससाठी मास्टर प्लॅन बनवला
मुंबई ः चॅम्पियन्स ट्रॉफी स्पर्धेचे विजेतेपद जिंकल्यानंतर भारतीय संघाचा कर्णधार रोहित शर्मा याने निवृत्तीच्या अटकळांना पूर्णविराम दिला आहे. त्यानंतर सर्वात मोठा प्रश्न असा होता की रोहित शर्माचे पुढील ध्येय २०२७ चा विश्वचषक आहे का? रोहितने यावर थेट उत्तर दिले नसले तरी, त्याच्या पुढील लक्ष्याची योजना तयार केली जात आहे.
रोहित शर्माने आधीच दोन आयसीसी ट्रॉफी जिंकल्या आहेत. परंतु विश्वचषकाचे काम अद्याप अपूर्ण आहे. त्यासाठी रोहित आता तयारी करताना दिसत आहे. रोहित शर्मा काही महिन्यांत ३८ वर्षांचा होईल आणि २०२७ च्या एकदिवसीय विश्वचषक स्पर्धेदरम्यान तो ४० वर्षांचा होईल. अशा परिस्थितीत सर्वात मोठा प्रश्न फिटनेसचा आहे. त्यामुळे रोहित ट्रोलर्सच्या रडारवर राहतो. अलिकडेच काँग्रेसच्या प्रवक्त्याने रोहितच्या तंदुरुस्तीवर प्रश्न उपस्थित केले होते. प्रवक्त्याला बरीच टीका सहन करावी लागली असली तरी, रोहित आता स्वतःच्या फिटनेससाठी एक मास्टर प्लॅन बनवणार आहे.
क्रिकबझमधील एका वृत्तानुसार रोहित शर्मा त्याच्या फिटनेस आणि फलंदाजीला मदत करण्यासाठी भारतीय संघाचे सहाय्यक प्रशिक्षक अभिषेक नायर यांच्यासोबत काम करण्याची योजना आखत आहे. अहवालात असे म्हटले आहे की त्याच्या भविष्याबाबत बरेच निर्णय आगामी आयपीएल २०२५ मधील त्याच्या कामगिरीवर अवलंबून असतील.
या संदर्भात कर्णधार म्हणून ऑस्ट्रेलियाला विश्वचषक विजय मिळवून देणारा रिकी पॉन्टिंग म्हणाला की, रोहित शर्मा अजूनही उत्कृष्ट खेळत आहे. त्याला त्याचे अपूर्ण काम पूर्ण करायचे आहे आणि यामुळे त्याला २०२७ च्या विश्वचषकापर्यंत भारताचे नेतृत्व करण्याची प्रेरणा मिळू शकते. हा विश्वचषक दक्षिण आफ्रिका, झिम्बाब्वे आणि नामिबियाच्या यजमानपदाखाली खेळला जाईल. रोहित शर्माने भारताचे नेतृत्व करताना एकदिवसीय विश्वचषक वगळता सर्व आयसीसी जेतेपदे जिंकली आहेत. रोहितच्या नेतृत्वाखाली भारत २०२३ च्या एकदिवसीय विश्वचषकाच्या अंतिम फेरीत पोहोचला पण ऑस्ट्रेलियाकडून पराभव पत्करावा लागला.
पुढील विश्वचषक खेळण्याचे ध्येय
रिकी पॉन्टिंगचा असा विश्वास आहे की, रोहित शर्मा त्याच्या भविष्यातील ध्येयांबद्दल खूप स्पष्ट आहे. आयसीसीच्या पुनरावलोकन कार्यक्रमात बोलताना पाँटिंग म्हणाला, ‘एक वेळ अशी येते जेव्हा तुम्ही तुमच्या कारकिर्दीत अशा टप्प्यावर पोहोचता जेव्हा प्रत्येक जण तुमच्या निवृत्तीची वाट पाहत असतो.’ मला माहित नाही का, जेव्हा तुम्ही अजूनही त्याच्या (रोहित) सारखे चांगले खेळू शकता. मला वाटतं तो त्या प्रश्नांची उत्तरे देत होता आणि म्हणत होता की मी अजूनही चांगला खेळत आहे. मला या संघात खेळायला आवडते.
पॉन्टिंग म्हणाला की, रोहित शर्माच्या मनात पुढील विश्वचषक (२०२७) खेळण्याचे ध्येय नक्कीच असेल असे त्याला वाटते.
