लिजंड्स प्रीमियर लीग क्रिकेट ः शतकवीर अशोक शिंदे सामनावीर
छत्रपती संभाजीनगर ः लिजंड्स प्रीमियर लीग टी २० क्रिकेट स्पर्धेत रविवारी झालेल्या दुसऱया सामन्यात डीएफसी श्रावणी संघाने न्यू एरा संघाचा ५३ धावांनी पराभव करत आपली आगेकूच कायम ठेवली. या सामन्यात शतकवीर अशोक शिंदे याने सामनावीर किताब पटकावला.
एमआयटी क्रिकेट स्टेडियमवर हा सामना झाला. डीएफसी श्रावणी संघाने नाणेफेक जिंकून प्रथम फलंदाजी करत २० षटकात सहा बाद २७२ असा धावांचा डोंगर उभारत सामन्यावर वर्चस्व गाजवले. या धावसंख्येच्या प्रत्युत्तरात न्यू एरा संघाने २० षटकात पाच बाद २१९ धावा काढत जोरदार संघर्ष केला. डीएफसी श्रावणी संघाने ५३ धावांनी सामना जिंकत आगेकूच कायम ठेवली.
या सामन्यात अशोक शिंदे याने अवघ्या ४१ चेंडूत ११७ धावांची तुफानी खेळी केली. शतकी खेळीत अशोक शिंदे याने तब्बल दहा षटकार व अकरा चौकार ठोकले. स्वप्नील खडसे याने ४० चेंडूत ७४ धावांची दमदार खेळी केली. त्याने चार उत्तुंग षटकार व नऊ चौकार मारले. नितीन भुईगळ याने अवघ्या २५ चेंडूत ७१ धावांची धमाकेदार खेळी केली. नितीनने आठ टोलेजंग षटकार व दोन चौकार मारले. गोलंदाजीत उत्सव बाहेती याने ४५ धावांत तीन गडी बाद केल. मोहम्मद इम्रान (१-१९) व बाळासाहेब मगर (१-१३) यांनी प्रत्येकी एक बळी घेतला.
संक्षिप्त धावफलक ः डीएफसी श्रावणी ः २० षटकात सहा बाद २७२ (निकित चौधरी ४४, पंकज ५, अशोक शिंदे ११७, नितीन भुईगळ नाबाद ७१, अमान शेख ६, सिद्ध जैन नाबाद १४, उत्सव बाहेती ३-४५, मोहम्मद इम्रान १-१९, प्रदीप जगदाळे १-६०, अजिंक्य पाथ्रीकर १-५७) विजयी विरुद्ध न्यू एरा संघ ः २० षटकात पाच बाद २१९ (प्रदीप जगदाळे १२, स्वप्नील खडसे ७४, सारंग सराफ १२, सुदर्शन एखंडे ५, ओंकार सुर्वे १६, मोहम्मद इम्रान नाबाद ६०, अजिंक्य पाथ्रीकर नाबाद ३०, तनवीर राजपूत १-३४, अमान शेख १-५२, बाळासाहेब मगर १-१३, दादासाहेब १-१८, पंकज १-२१). सामनावीर ः अशोक शिंदे.
