खेलो इंडिया पॅरा स्पर्धा ः शुक्रवारपासून रंगणार अ‍ॅथलेटिक्सचा थरार
नवी दिल्ली : महाराष्ट्राच्या सुकांत कदम, प्रेम अले यांनी अपेक्षेप्रमाणे विजयी सलामी देत खेलो इंडिया पॅरा स्पर्धेचा उपांत्यपूर्व फेरीत मजल मारली आहे. दुसर्‍या पर्वाचे शानदार उद्घाटन केेंद्रिय क्रीडा मंत्री मनसुख मांडविया यांच्या हस्ते झाले.
नवी दिल्लीच्या इंदिरा गांधी क्रीडा संकुलातील जिम्नॉस्टिक्स हॉलमध्ये सुरू असलेल्या पॅरा बॅडमिंटनमध्ये महाराष्ट्राच्या खेळाडूंनी गुरुवारी दमदार कामगिरीचे प्रदर्शन घडविले. एस एल ४ गटात सांगलीचा सुकांत कदम याने महाराष्ट्राच्याच निलेश गायकवाड याचा २१-१०, २१-१९ सेटने पराभव केला. जागतिक क्रमवारीत दुसर्‍या स्थानावर असणार्‍या सुकांतने पहिला सेट सहजपणे जिंकून लढतीवर पकड घेतला होती. दुसर्‍या सेटमध्ये त्याना संघर्ष करावा लागला. अनुभवी सुकांतने आघाडी कायम राखत विजयी सलामी दिली.
पॅरिस ऑलिम्पिकमध्ये चमकदार कामगिरी करणार्‍या सुकांत प्रथमच खेलो इंडिया पॅरा स्पर्धेत सहभागी झाला आहे. पुण्यात प्रशिक्षक निखिल कानेटकर, मयंक गोळे यांच्या मार्गदर्शनाखाली सराव करणार्‍या सुकांत स्पर्धेतील सुवर्णपदकाचा प्रमुख दावेदार आहे. शुक्रवारी उपांत्यपूर्व फेरीत सुकांत याची लढत छत्तीसगडच्या अभिजीत सकुजा विरूद्ध रंगणार आहे.
व्हिलचेअरच्या डब्ल्यू एच १ गटात महाराष्ट्राच्या प्रेमकुमार अले यांनी उत्तर प्रदेशच्या सिराजउद्दीनवर सहज मात केली. २१-१२, २१-१४ सेटने प्रेमकुमार अले यांनी पहिली फेरी जिंकून उपांत्यपूर्व फेरीत प्रवेश निश्चित केला. सर्व्हिसेसमधून निवृत्त झाल्यानंतर पॅरा बॅडमिंटन खेळण्याची सुरुवात प्रेमकुमार यांनी पुण्यात केली. आंतरराष्ट्रीय स्तरावर १० सुवर्णपदकांची कामगिरी करणारे प्रेमकुमार प्रथमच खेलो इंडिया पॅरा स्पर्धेत सहभागी झाले आहेत.
शुक्रवारपासून (२१ मार्च) अ‍ॅथलेटिक्सचा थरार रंगणार आहे. ऑलिम्पिक रौप्यपदक विजेता सचिन खिलारी दुखापतग्रस्त असल्याने दुसर्‍या स्पर्धेत खेळताना दिसणार नाही. गत स्पर्धेत सचिन खिलारी याने सुवर्णपदक जिंकले होते. यंदा संदीप सलगर, भाग्यश्री जाधव, दिलीप गावित हे पॅरिस ऑलिम्पिकपटू अ‍ॅथलेटिक्सचे मैदान गाजविताना दिसतील.
