विराट कोहलीला दिले श्रेय; गोलंदाजांच्या कामगिरीवर खुश
कोलकाता ः रॉयल चॅलेंजर्स बंगळुरू संघाने कोलकाता नाईट रायडर्स संघाला सात विकेट्सने पराभूत करून आयपीएल स्पर्धेत त्यांच्या मोहिमेची शानदार सुरुवात केली. कर्णधार म्हणून नव्या कारकिर्दीची विजयाने सुरुवात करणाऱया रजत पाटीदार याने आनंद व्यक्त करताना विजयाचे श्रेय स्टार फलंदाज विराट कोहली याला दिले.
सामन्यानंतर रजत पाटीदार म्हणाला की, माझ्यावर दबाव होता, पण तो माझ्यासाठी चांगला दिवस होता. आशा आहे की असेच आणखी दिवस येतील. विराट कोहलीच्या नेतृत्वाखाली खेळणे खूप छान वाटते. तो एक उत्तम आधार आहे, सर्वोत्तम खेळाडूंपैकी एकाकडून शिकण्याची ही एक उत्तम संधी आहे. टॉस हरल्यानंतर आणि प्रथम फलंदाजी केल्यानंतर, गतविजेत्या संघाने अजिंक्य रहाणे आणि सुनील नारायण यांच्या शतकी भागीदारीच्या जोरावर २० षटकांत आठ गडी गमावून १७४ धावा केल्या. प्रत्युत्तरात, आरसीबीने १६.२ षटकांत ३ बाद १७७ धावा केल्या आणि २२ चेंडू शिल्लक असताना सामना जिंकला.
गोलंदाजांच्या कामगिरीवर पाटीदार खूश
आयपीएल २०२५ मध्ये, रजत पाटीदारने कर्णधार म्हणून आपल्या कारकिर्दीची सुरुवात उत्तम प्रकारे केली. सामन्यानंतर त्याने फिरकी गोलंदाज कृणाल पंड्याचे कौतुक केले. याशिवाय पाटीदार यांनी लेग स्पिनर सुयश शर्माचेही कौतुक केले. पाटीदार म्हणाले – आम्हाला (आंद्रे) रसेलची विकेट हवी होती, त्याने (सुयश) धावा देऊन काही फरक पडला नाही. तो आमच्या मुख्य गोलंदाजांपैकी एक आहे, आम्ही त्याला पाठिंबा दिला. सर्व श्रेय कृणाल आणि सुयश यांना जाते कारण त्यांचा संघ १३ व्या षटकात १३० धावांवर होता. यानंतर गोलंदाजांनी धाडस आणि दृढनिश्चय दाखवला.
रहाणे नाराज
हंगामातील पहिल्या सामन्यातील पराभवानंतर, केकेआर संघाचा कर्णधार अजिंक्य रहाणे म्हणाला की त्याच्या संघाला शक्य तितक्या लवकर एक युनिट म्हणून सुधारणा करावी लागेल. आम्ही १३ व्या षटकापर्यंत चांगले खेळत होतो, पण दोन-तीन विकेट गमावल्यानंतर आमची लय बिघडली. आपल्याला आपल्या चुकांमधून शिकावे लागेल. जेव्हा मी आणि वेंकटेश फलंदाजी करत होतो, तेव्हा आम्हाला वाटले की या खेळपट्टीवर आपण २१०-२२० धावा कराव्यात पण आम्ही विकेट गमावल्या. मैदानावर दव पडला होता, पण त्यांचा पॉवर प्ले खूप चांगला होता. आम्हाला सुरुवातीच्या विकेट घेण्यात अपयश आले. आम्हाला या सामन्याबद्दल जास्त विचार करायचा नाही आणि एक संघ म्हणून सुधारणा करायची आहे.
