आमणी नांदलचे धमाकेदार शतक
पुणे ः महाराष्ट्र क्रिकेट संघटनेतर्फे आयोजित एमसीए सीनियर महिला एकदिवसीय ट्रॉफी सुपर लीग क्रिकेट स्पर्धेत पीडीसीए महिला संघाने जालना महिला संघावर २२८ धावांनी दणदणीत विजय नोंदवला. आमणी नांदल हिने सामनावीर पुरस्कार संपादन केला.
पीवायसी हिंदू जिमखाना मैदानावर हा सामना झाला. पीडीसीए महिला संघाने नाणेफेक जिंकून प्रथम फलंदाजी स्वीकारत ५० षटकात चार बाद ४०३ अशी विक्रमी धावसंख्या उभारुन सामन्यावर वर्चस्व गाजवले. या मोठ्या आव्हानात्मक धावसंख्येचा पाठलाग करताना जालना महिला संघ ५० षटकात आठ बाद १७५ धावा काढण्यात यशस्वी ठरला. पीडीसीए महिला संघाने तब्बल २२८ धावांनी सामना जिंकला.
या सामन्यात आमणी नांदल हिने अवघ्या ८४ चेंडूत १३७ धावांची धमाकेदार शतकी खेळी केली. तिने २२ चौकार व एक षटकार मारला. अक्षया जाधव हिने ७२ चेंडूत ८० धावांची जलद अर्धशतकी खेळी केली. तिने १४ चौकार मारले. गायत्री हांडे हिने ५२ चेंडूत ५८ धावा फटकावल्या. तिने एक षटकार व दहा चौकार मारले. गोलंदाजीत सृष्टी भांगे (२-२६), मीना गुरवे (२-७१) व पायल (१-९) यांनी विकेट घेतल्या.
संक्षिप्त धावफलक ः पीडीसीए महिला संघ ः ५० षटकात चार बाद ४०३ (जया शिंदे २८, गायत्री हांडे ५८, अक्षया जाधव ८०, आमणी नांदल नाबाद १३७, प्रांजली पिसे ४५, तृष्णा नहार नाबाद १६, इतर ३९, मीना गुरवे २-७१, मानिनी वायाळ १-३०) विजयी विरुद्ध जालना महिला संघ ः ५० षटकात आठ बाद १७५ (अरुषी गलांडे २६, रुशिता जंजाळ ७, कार्तिकी देशमुख ७, मानिनी वायाळ २७, रुही सिंग १४, तन्वी पाटील नाबाद ३७, जावरिया कुरेशी नाबाद २८, इतर २५, सृष्टी भांगे २-२६, प्रांजली पिसे १-२६, अवंती तुपे १-२६, जया शिंदे १-१९, यशस्वी वाघमारे १-११, पायल १-९). सामनावीर ः आमणी नांदल.
