पुणे ः इस्टोनिया कुस्ती संघटनेच्या वतीने टॅल्लिन (इस्टोनिया) युरोप येथे २७ मार्च ते १ एप्रिल दरम्यान होणाऱ्या जागतिक स्तरावरील आंतरक्लब कुस्ती स्पर्धेसाठी इस्टोनिया कुस्ती संघटनेच्या वतीने प्रा दिनेश गुंड यांची तांत्रिक अधिकारी (पंच) म्हणून निवड करण्यात आली.
आंतरराष्ट्रीय स्तरावर तांत्रिक अधिकारी म्हणून निवड होण्याची ही त्यांची ६३ वी वेळ आहे. जागतिक कुस्ती संघटनेचे प्रा. दिनेश गुंड हे प्रथम श्रेणीचे पंच असून राष्ट्रीय व आंतरराष्ट्रीय स्तरावर गेल्या २० वर्षात त्यांनी आपल्या कामगिरीचा विक्रम नोंदविला आहे. सन २००३ पासून आतापर्यंत राज्य, राष्ट्रीय स्तरावर स्पर्धा प्रमुख, निवड समिती प्रमुख, पंचांना प्रशिक्षण देणे या कामामध्ये त्यांचे महाराष्ट्रातीलच नव्हे तर देशातील योगदान खूप मोलाचे आहे.
