छत्रपती संभाजीनगर ः तेलंगणाची राजधानी हैदराबाद येथे तेलंगणा राज्य टेनिस संघटना आयोजित ऍश टेनिस अकादमी शमीरपेठ, सिकंदराबाद हैदराबाद येथे नुकत्याच झालेल्या अखिल भारतीय टेनिस स्पर्धेत छत्रपती संभाजीनगरचा प्रतिभावान खेळाडू प्रणव कोरडे याने नैसिक रेड्डीच्या साथीने दुहेरीत उपविजेतेपद पटकावले.
प्रणव व नैसिक रेड्डी यांनी मानांकित प्रगती आणि रेड्डी यांना ६-७, ६-४, १०-५ अशा फरकाने नमवत उपांत्य फेरीत धडक मारली. तसेच या जोडीने अतिशय उच्च दर्जाचा खेळ करून स्पर्धेमध्ये सनसनाटी निर्माण केली. त्यानंतर अव्वल मानांकित प्रणव व नैसिक रेड्डी या जोडीने उपांत्य फेरीत तनिष आणि नीलम देवहर्ष यांच्यावर ६-७ (५), ७-५, १०-५ अशी मात केली. मात्र, अंतिम सामन्यात या जोडीला द्वितीय मानांकित खाजा विनायक व जयप्रकाश यांच्याविरुद्ध अटीतटीच्या सामन्यात पराभव पत्करावा लागला.
खाजा विनायक व जयप्रकाश यांनी अंतिम सामना २-६, ३-६ असा जिंकत विजेतेपदावर शिक्कामोर्तब केले. उपविजेतेपद पटकावणाऱ्या प्रणव कोरडे हा एक प्रतिभावान खेळाडू असून याला प्रशिक्षक गजेंद्र भोसले यांचे मार्गदर्शन लाभले आहे. सध्या प्रणव कोरडे हा एटीपी आंतरराष्ट्रीय स्पर्धेच्या दृष्टीने तयारी करण्याच्या हेतूने बंगळुरू येथील पीबीआय टेनिस अकॅडमीमध्ये प्रशिक्षण घेत आहे.
या शानदार कामगिरीबद्दल छत्रपती संभाजीनगरच्या अधिवक्ता परिषदेचे अध्यक्ष ॲड श्रीकांत अदवंत व सीनियर कौन्सिल संजीव देशपांडे, मुंबई उच्च न्यायालय खंडपीठाचे मुख्य सरकारी वकील ॲड अमरजीत गिरासे यांनी प्रणव ज्ञानेश्वर कोरडे याचे अभिनंदन केले व पुढील वाटचालीस शुभेच्छा दिल्या आहेत.
