पाच सामन्यांची मालिका, २६ एप्रिलपासून प्रारंभ
नवी दिल्ली ः भारतीय महिला हॉकी संघ पाच सामन्यांच्या मालिकेसाठी ऑस्ट्रेलिया दौऱ्यावर जाणार आहे. हॉकी इंडियाने गुरुवारी ही माहिती दिली. ही मालिका २६ एप्रिल ते ४ मे पर्यंत चालेल.
भारतीय संघ २६ आणि २७ एप्रिल रोजी ऑस्ट्रेलिया-अ विरुद्ध दोन सामन्यांनी मालिकेची सुरुवात करेल. त्यानंतर, भारतीय संघ ऑस्ट्रेलियाच्या वरिष्ठ संघाविरुद्ध तीन सामन्यांची मालिका खेळेल. वरिष्ठ संघासोबतचे सामने १, ३ आणि ४ मे रोजी खेळवले जातील. सर्व सामने पर्थ हॉकी स्टेडियमवर होतील.
जूनमध्ये सुरू होणाऱ्या एफआयएच प्रो लीग २०२४-२५ च्या युरोपियन लेगच्या तयारीच्या दृष्टीने हा दौरा महत्त्वाचा आहे. नवव्या स्थानावर असलेल्या भारताने २०२३-२४ च्या एफआयएच प्रो लीगमध्ये ऑस्ट्रेलियाचा शेवटचा सामना १-० असा जिंकला होता, परंतु २०१३ पासून या दोन्ही संघांमध्ये खेळल्या गेलेल्या १६ पैकी १० सामने ऑस्ट्रेलियाने जिंकले आहेत. भारताने तीन विजय नोंदवले आहेत, तर तीन सामने अनिर्णित राहिले आहेत.
भारतीय महिला संघाचे मुख्य प्रशिक्षक हरेंद्र सिंग यांनी ऑस्ट्रेलिया दौऱ्याबाबत सांगितले की, ‘एफआयएच प्रो लीगच्या युरोपियन टप्प्यासाठीच्या आमच्या तयारीचा विचार करता हा दौरा खूप महत्त्वाचा आहे. ऑस्ट्रेलियासारख्या बलाढ्य संघाविरुद्ध खेळल्याने आपल्या खेळाडूंना त्यांच्या खेळाचे मूल्यांकन करण्याची चांगली संधी मिळेल.
