दुखापतीमुळे रुतुराज गायकवाड आयपीएल स्पर्धेतून बाहेर
चेन्नई ः कोलकाता नाईट रायडर्स (केकेआर) विरुद्धच्या सामन्यापूर्वी चेन्नई सुपर किंग्ज (सीएसके) संघाला एक मोठा धक्का बसला आहे. कर्णधार रुतुराज गायकवाड दुखापतीमुळे बाहेर पडला आहे. त्याच्या जागी महेंद्रसिंग धोनीला संघाचे कर्णधारपद देण्यात आले आहे. धोनी आता गायकवाडच्या जागी आगामी सामन्यांमध्ये संघाचे नेतृत्व करताना दिसेल.
चेन्नईचा पुढील सामना शुक्रवारी केकेआर संघाविरुद्ध होईल. या सामन्यापूर्वी सीएसकेला मोठा धक्का बसला आहे. कर्णधार रुतुराज गायकवाड कोपराच्या दुखापतीमुळे संपूर्ण हंगाम बाहेर पडला आहे. चेन्नई संघाचे प्रशिक्षक स्टीफन फ्लेमिंग यांनी याची पुष्टी केली. फ्लेमिंग म्हणाला की, स्टार फलंदाजाऐवजी धोनी आता संघाचे नेतृत्व करताना दिसेल.
कर्णधार बदलला
चेन्नई सुपर किंग्जने हंगामाच्या मध्यभागी कर्णधार बदलून सर्वांना आश्चर्यचकित केले आहे. तथापि, सीएसकेने संघाची सूत्रे दुसऱ्या कोणाकडे सोपवण्याची ही पहिलीच वेळ नाही. यापूर्वी, संघाने आयपीएल २०२४ सुरू होण्यापूर्वी रुतुराजला कर्णधार बनवले होते. धोनी आणि गायकवाड व्यतिरिक्त, सुरेश रैना आणि रवींद्र जडेजा यांनीही संघाचे नेतृत्व केले आहे. धोनीच्या अनुपस्थितीत रैना संघाचे नेतृत्व करत होता, तर स्पर्धा सुरू होण्यापूर्वी आयपीएल २०२२ मध्ये जडेजाला पूर्णपणे नवीन कर्णधार बनवण्यात आले. तथापि, त्या हंगामात संघाची कामगिरी खूपच खराब होती आणि अर्ध्या हंगामानंतर धोनीने पुन्हा कर्णधारपद स्वीकारले आणि २०२३ मध्ये, त्याने त्याच्या नेतृत्वाखाली पाचव्यांदा संघाला विजेतेपदापर्यंत नेले होते.
