वयाच्या ६४व्या वर्षी आंतरराष्ट्रीय क्रिकेट सामना खेळून रचला इतिहास
नवी दिल्ली ः सध्या भारतात इंडियन प्रीमियर लीगची क्रेझ आहे. चेन्नई सुपर किंग्जचा कर्णधार रुतुराज गायकवाडने स्पर्धेतून माघार घेतल्यानंतर एमएस धोनीने पुन्हा एकदा संघाचे नेतृत्व हाती घेतले आहे. काही दिवसांपूर्वीपर्यंत धोनीच्या निवृत्तीबद्दल अफवा होत्या कारण तो आता ४३ वर्षांचा आहे. दरम्यान, धोनीपेक्षा २० वर्षांनी मोठ्या असलेल्या जोआना चाइल्ड हिने वयाच्या ६४ व्या वर्षी आंतरराष्ट्रीय क्रिकेटमध्ये पदार्पण करून सर्वांचे लक्ष वेधून घेतले आहे.
एमएस धोनीच्या वाढत्या वयामुळे आयपीएलमधून निवृत्तीच्या अफवा सतत पसरत आहेत. दरम्यान, पोर्तुगालच्या जोआना चाइल्ड हिने वयाच्या ६४ व्या वर्षी टी २० आंतरराष्ट्रीय क्रिकेटमध्ये पदार्पण केले. ७ एप्रिल रोजी नॉर्वेविरुद्धच्या टी २० मालिकेतील पहिल्या सामन्यात ती पोर्तुगाल संघाकडून खेळली.
आंतरराष्ट्रीय क्रिकेटमध्ये सर्वात जास्त वयात पदार्पण करणाऱ्या खेळाडूंच्या यादीत ती दुसऱ्या क्रमांकावर आली आहे. तिने फॉकलंड बेटांचे अँड्र्यू ब्राउनली (६२ वर्षे, १४५ दिवस) आणि केमन्सचे मेली मूर (६२ वर्षे, २५ दिवस) यांना मागे टाकले. आता फक्त जिब्राल्टरची सॅली बार्टन तिच्या पुढे आहे, जिने ६६ वर्षे आणि ३३४ दिवसांच्या वयात पदार्पण केले होते.
जोआना चाइल्डची पदार्पणाच्या सामन्यात कामगिरी विशेष नव्हती, तिने फक्त २ धावा केल्या. तथापि, पोर्तुगालने हा सामना जिंकला. यानंतर, पोर्तुगालने मालिकेतील निर्णायक सामनाही जिंकला. त्यामध्ये जोआना देखील प्लेइंग ११ चा भाग होती. पोर्तुगालने मालिका २-१ ने जिंकली.
पोर्तुगाल संघाची कर्णधार सारा फू रायलँडने जोआना चाइल्डचे कौतुक केले आणि तिला अनेक क्रिकेटपटूंसाठी प्रेरणास्थान म्हटले. कर्णधार देखील ४४ वर्षांची आहे.
