नाशिक ः आंतरराष्ट्रीय खेळाडू मुकुंद संतोष आहेर आणि साईराज राजेश परदेशी यांना नाशिक जिल्हा क्रीडा अधिकारी कार्यालयातर्फे जिल्हा गुणवंत खेळाडू पुरस्कार जाहीर झाला आहे.
राष्ट्रीय व आंतरराष्ट्रीय वेटलिफ्टिंग स्पर्धांमध्ये सातत्याने उल्लेखनीय कामगिरी करणाऱ्या मनमाडच्या जय भवानी व्यायामशाळेच्या मुकुंद आहेर व साईराज परदेशी यांना नाशिक जिल्हा क्रीडा अधिकारी कार्यालयातर्फे जिल्हास्तरीय थेट गुणवंत खेळाडू पुरस्कार जाहीर करण्यात आला आहे. १ मे रोजी पालकमंत्री यांच्या हस्ते शासकीय कार्यक्रमात पोलिस परेड ग्राउंड नाशिक येथे गौरविण्यात येणार आहे.
स्मृतिचिन्ह प्रमाणपत्र व रोख दहा हजार असे पुरस्काराचे स्वरूप असून गत दोन वर्षात आंतरराष्ट्रीय स्पर्धेत भारतीय संघाचे प्रतिनिधित्व करीत मुकुंद आहेर व साईराज परदेशी यांनी पदके पटकावली आहेत. याच कामगिरीच्या जोरावर जिल्हास्तरीय गुणवंत खेळाडू थेट पुरस्काराने सन्मानित करण्यात येणार आहे. पुरस्कारार्थी खेळाडूंना छत्रे विद्यालयाचे मुख्याध्यापक क्रीडा प्रशिक्षक प्रवीण व्यवहारे व आंतरराष्ट्रीय प्रशिक्षक तृप्ती पाराशर यांचे मार्गदर्शन लाभले आहे.
