प्रोफेशनल ट्रॉफी अंडर १४ क्रिकेट ः श्लोक देशमुख सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत एएसएफ संघाने पीसीए९९ अ संघावर ५६ धावांनी विजय साकारला. या सामन्यात आक्रमक अर्धशतक ठोकणारा श्लोक देशमुख याने सामनावीर पुरस्कार मिळवला.
प्रोफेशनल क्रिकेट अकादमी९९चे मुख्य संचालक व प्रशिक्षक आदित्य नाईक यांनी या स्पर्धेचे आयोजन पडेगाव येथील अविनाश साळवी फाऊंडेशन क्रिकेट मैदानावर केले आहे. एएसएफ संघाने नाणेफेक जिंकून प्रथम फलंदाजी स्वीकारत २५ षटकात पाच बाद १९९ धावसंख्या उभारली. प्रत्युत्तरात पीसीए९९ अ संघ २५ षटकात सात बाद १४३ धावा काढू शकला. एएसएफ संघाने ५६ धावांनी सामना जिंकला.
या सामन्यात श्लोक देशमुख याने ५८ चेंडूत ७३ धावांची बहारदार खेळी साकारली. त्याने १३ चौकार मारले. झैद खान याने ४१ चेंडूत ५५ धावा फटकावल्या. त्याने पाच चौकार व एक षटकार मारला. आदर्शराजे घोलप याने ३१ चेंडूत सहा चौकारांसह ३४ धावांचे योगदान दिले. गोलंदाजीत विष्णू कुर्रा (२-११), आदित्य अढाव (२-१९), आदर्शराजे घोलप (२-२१) यांनी प्रभावी गोलंदाजी करत प्रत्येकी दोन विकेट घेतल्या.
संक्षिप्त धावफलक
एएसएफ टीम ः २५ षटकात पाच बाद १९९ (कार्तिक गेहलोत १३, श्लोक देशमुख नाबाद ७३, असद युनूस सय्यद ३२, झैद खान ५५, इतर १६, आदर्शराजे घोलप २-२१, ओम रावले १-४१, सुदर्शन पाटील १-२०, मोहम्मद साद १-२८) विजयी विरुद्ध पीसीए९९ अ टीम ः २५ षटकात सात बाद १४३ (देवव्रत पवार ६, आदर्शराजे घोलप ३४, आदेश बंगाल ८, सर्वेश बालाप १७, गायत्री झिरपे २२, तनिष्क सावरकर ६, ओम रावले नाबाद ३३, इतर १७, आदित्य अघाव २-१९, विष्णू कुर्रा २-११, नूर सय्यद १-५०, कार्तिक गेहलोत १-१२, असद युनूस सय्यद १-५). सामनावीर ः श्लोक देशमुख.
