प्रोफेशनल ट्रॉफी अंडर १४ क्रिकेट – रुद्राक्ष कार्ले सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत प्रदीप स्पोर्ट्स संघाने पीसीए९९ ब संघावर पाच गडी राखून विजय साकारत आपली विजयी आगेकूच कायम ठेवली. या सामन्यात रुद्राक्ष कार्ले याने ५४ धावा फटकावत सामनावीर पुरस्कार संपादन केला.
पडेगाव येथील अविनाश साळवी फाऊंडेशन क्रिकेट मैदानावर ही स्पर्धा होत आहे. अंडर १४ क्रिकेटपटूंना व्यापक खेळण्याची संधी मिळावी या हेतूने प्रोफेशनल क्रिकेट ट्रॉफीचे आयोजन करण्यात आले असल्याचे प्रोफेशनल क्रिकेट अकादमीचे मुख्य संचालक व प्रशिक्षक आदित्य नाईक यांनी सांगितले. या सामन्यात प्रदीप स्पोर्ट्स संघाने नाणेफेक जिंकून गोलंदाजी करण्याचा निर्णय घेतला. पीसीए९९ ब संघ प्रथम फलंदाजी करताना २१ षटकात अवघ्या ११३ धावांवर सर्वबाद झाला. प्रदीप स्पोर्ट्स संघाने १५.५ षटकात पाच बाद ११४ धावा फटकावत पाच विकेट राखून सामना जिंकला.
या सामन्यात रुद्राक्ष कार्ले याने ४१ चेंडूत ५४ धावांची दमदार अर्धशतकी खेळी केली. त्याने पाच चौकार व तीन षटकार मारले. कार्तिक भारद्वाज याने १९ चेंडूत २६ धावा फटकावल्या. त्याने तीन चौकार व एक षटकार मारला. प्रतीक कदम याने चार चौकारांसह १७ धावांचे योगदान दिले.
गोलंदाजीत प्रेम भालेराव याने १६ धावांत तीन विकेट घेऊन आपला ठसा उमटवला. मयूर सोमासे याने ६ धावांत दोन बळी घेतले. अवनीश देसाई याने २३ धावांत दोन गडी टिपले.
संक्षिप्त धावफलक
पीसीए९९ ब टीम ः २१ षटकात सर्वबाद ११३ (प्रतीक कदम १७, नमन चौधरी १६, प्रणव कदम ८, कार्तिक भारद्वाज २६, कार्तिक आटोळे नाबाद १२, प्रज्वल तिलकरी ६, सोहम हारके ५, इतर १७, प्रेम भालेराव ३-१६, मयूर सोमासे २-६, आरोही आहेर १-१४, आर्यन शिंदे १-१४, सुमेध कांबळे १-३८) पराभूत विरुद्ध प्रदीप स्पोर्ट्स ः १५.५ षटकात पाच बाद ११४ (वरद सुलतान १२, रुद्राक्ष कार्ले नाबाद ५४, आयुष भेंडेकर १४, सत्यजीत ४, शाद शेख नाबाद ४, इतर २५, अवनीश देसाई २-२३, नमन चौधरी १-१२, प्रज्वल तिलकरी १-६). सामनावीर ः रुद्राक्ष कार्ले.
