छत्रपती संभाजीनगर अंडर १४ टी २० लीग ः आर्यन गोजे सामनावीर
छत्रपती संभाजीनगर ः छत्रपती संभाजीनगर अंडर १४ टी २० प्रीमियर लीग क्रिकेट स्पर्धेत युवराज क्रिकेट अकादमी संघाने एमई वॉरियर्स संघावर १०५ धावांनी विजय मिळवून आगेकूच केली. या सामन्यात आर्यन गोजे याने सामनावीर पुरस्कार मिळवला.
गरवारे क्रिकेट स्टेडियमवर या स्पर्धेचे आयोजन युनिव्हर्सल क्रिकेट अकादमीचे मुख्य प्रशिक्षक राहुल पाटील व जाधव क्रिकेट अकादमीचे मुख्य प्रशिक्षक संदीप जाधव यांनी केले आहे. या सामन्यात युवराज क्रिकेट अकादमीने नाणेफेक जिंकून प्रथम फलंदाजी करत २० षटकात सहा बाद १७९ अशी भक्कम धावसंख्या उभारली. या धावसंख्येचा पाठलाग करताना एमई वॉरियर्स संघ २० षटकात नऊ बाद ७४ धावा काढू शकला. युवराज क्रिकेट अकादमीने तब्बल १०५ धावांनी सामना जिंकला.
या सामन्यात आर्यन गोजे याने अवघ्या ३८ चेंडूत ६१ धावा फटकावल्या. आर्यनने आपल्या आक्रमक अर्धशतकी खेळीत सात चौकार व दोन षटकार मारले. सर्वेश अघाव याने २२ चेंडूत ४३ धावांची वेगवान खेळी साकारली. सर्वेश याने चार उत्तुंग षटकार व एक चौकार मारला. राजवीर परदेशी याने २३ धावा काढल्या. त्याने दोन चौकार मारले. गोलंदाजीत क्षितिज (१-१), झैद पठाण (१-२) व राजवीर परदेशी (१-१२) यांनी प्रत्येकी एक गडी बाद केला.
संक्षिप्त धावफलक
युवराज क्रिकेट अकादमी ः २० षटकात सहा बाद १७९ (एस एस पाटील १४, राजवीर परदेसी २३, सर्वेश अघाव ४३, आर्यन गोजे ६१, सदगुरू रेड्डी ८, इतर २४, रिदम साहुजी १-१२, जिशान शेख १-३०, श्रेयस लाड १-१९, स्वरुप घोडेले १-२९, अर्जुन शेळके १-३८) विजयी विरुद्ध एमई वॉरियर्स ः २० षटकात नऊ बाद ७४ (विश्वराज काकडे ८, अर्जुन शेळके १२, साईराज बलांडे २१, इतर ३०, कार्तिक १-१४, राजवीर परदेशी १-१२, सदगुरू रेड्डी १-१४, क्षितिज १-१, झैद पठाण १-२). सामनावीर ः आर्यन गोजे.
