प्रोफेशनल ट्रॉफी अंडर १४ क्रिकेट ः काव्या सांगळे सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत एएसएफ संघाने रोमहर्षक सामन्यात पीसीए९९ क संघावर अवघ्या आठ धावांनी विजय मिळवत आगेकूच केली. या सामन्यात काव्या सांगळे हिने सामनावीर पुरस्कार संपादन केला.
पडेगाव येथील अविनाश साळवी फाऊंडेशन क्रिकेट मैदानावर ही स्पर्धा होत आहे. अंडर १४ क्रिकेटपटूंना व्यापक खेळण्याची संधी मिळावी या हेतूने प्रोफेशनल क्रिकेट ट्रॉफीचे आयोजन करण्यात आले असल्याचे प्रोफेशनल क्रिकेट अकादमीचे मुख्य संचालक व प्रशिक्षक आदित्य नाईक यांनी सांगितले. या सामन्यात एएसएफ संघाने नाणेफेक जिंकून प्रथम फलंदाजी स्वीकारत २०.२ षटकात नऊ बाद १३१ धावसंख्या उभारली. या धावसंख्येचा पाठलाग करताना पीसीए९९ क संघ २१ षटकात सर्वबाद १२३ धावा काढू शकला. एएसएफ संघाने आठ धावांनी रोमांचक लढत जिंकली.
या सामन्यात आर्यन राठोड याने ४१ चेंडूत ४० धावा फटकावल्या. त्याने आठ चौकार मारले. कार्तिक गेहलोत याने २९ चेंडूत ३२ धावा काढल्या. त्याने सहा चौकार मारले. झैद खान याने २० चेंडूत चार चौकारांसह २६ धावा काढल्या.
गोलंदाजीत काव्या सांगळे हिने २१ धावांत तीन विकेट घेऊन सामना गाजवला. अर्णव लिखे याने २० धावांत तीन गडी बाद केले. देवेंद्र याने ३९ धावांत दोन बळी घेतले.
संक्षिप्त धावफलक
एएसएफ टीम ः २०.२ षटकात नऊ बाद १३१ (कार्तिक गेहलोत ३२, झैद खान २६, प्रत्युष उघाडे २५, श्लोक देशमुख १३, काव्या सांगळे नाबाद ५, इतर २०, आर्यन जाधव २-३३, सोहम पिंपळे २-३५, देवेंद्र २-३९, शौर्य राजपूत १-१६, अंगराज सिंग १-७, अर्जुन वडगावकर १-१) विजयी विरुद्ध पीसीए९९ क टीम ः २१ षटकात सर्वबाद १२३ (अर्णव जोशी १३, अर्जुन वडगावकर ९, कारक भारद्वाज १२, आर्यन राठोड ४०, आरुष राजगुरू ८, आतिश शिंदे १७, इतर १९, काव्या सांगळे ३-२१, अर्णव लिखे ३-२०, विष्णू कुर्रा १-१९, कार्तिक गेहलोत १-१६). सामनावीर ः काव्या सांगळे.
