जुई नारकर, ग्रीष्मा थोरात, आनंदी सांगळे यांना रौप्य
राजगीर : महाराष्ट्राच्या मुलींनी सातव्या खेलो इंडिया युवा क्रीडा स्पर्धेत मंगळवारी सायकलिंगमध्ये एक, तर वेटलिफ्टिंगमध्ये २ रौप्य पदकाची कमाई करीत दिवस गाजविला. सायकलिंगमध्ये मुंबईच्या जुई नारकरने तर वेट लिफ्टिंगमध्ये ग्रीष्मा थोरात व आनंदी सांगळे यांनी देखील रौप्यपदक जिंकले.
ट्रॅक सायकलिंग स्पर्धेत पदकांची लयलूट केल्यानंतर महाराष्ट्राच्या सायकलपटूंनी रोड सायकलिंग स्पर्धेत पदकाचे खाते उघडले. मुलींच्या २० किलो मीटर रोड रायकलिंग स्पर्धेत जुई नारकर हिने ३२ मिनिटे ४९.२९१ सेंकद वेळेसह महाराष्ट्राला कांस्यपदक जिंकून दिले. मुंबईची ही खेळाडू पंकज मार्लेशा यांच्या मार्गदर्शनाखाली सराव करते. राजस्थानच्या मंजू चौधरी हिने ३२ मिनिटे १५.१४२ सेंकद वेळेसह सुवर्णपदकाला गवसणी घातली. राजस्थानचीच रुख्मणी ३३ मिनिटे ४०.२३३ सेंकद वेळेसह कांस्यपदकाची मानकरी ठरली. लवकर सुरुवात केल्यामुळे रुख्मणी हिला एक सेंकद वेळेची पेनल्टी मिळाली.
राजगीरमध्ये सुरू असलेल्या वेटलिफ्टिंग स्पर्धेत महाराष्ट्राच्या ग्रिष्मा थोरात हिने रौप्य पदकाची कमाई केली. ठाण्याच्या या खेळाडूने ७६ किलो गटात स्नॅचमध्ये ७७ किलो, तर क्लिन अॅण्ड जर्कमध्ये ९५ किलो असे एकूण १७२ किलो वजन उचलून हे रूपेरी यश संपादन केले. ती मधुरा सिंहासने यांच्या मार्गदर्शनाखाली सराव करते. उत्तर प्रदेशच्या किर्ती कुमारी हिने स्नॅचमध्ये ८१ किलो, तर क्लिन अॅण्ड जर्कमध्ये १०२ किलो असे एकूण १८३ किलो वजन उचलत सहजपणे सुवर्णपदक जिंकले. तमिळनाडूची हसीना शरीन ही (स्नॅचमध्ये ७६ किलो, तर क्लिन अॅण्ड जर्कमध्ये ८९ किलो) एकूण १६५ किलो वजन उचलत कांस्यपदक पटकाविले.
मनमाडच्या आनंदी सांगळे हिने ८१ किलो गटात स्नॅचमध्ये ८० किलो, तर क्लिन अॅण्ड जर्कमध्ये ९५ किलो असे एकूण १७५ किलो वजन उचलून रूपेरी यश संपादन केले. १ किलो वजनाने आनंदीचे सुवर्णपदक हुकले. नाशिकमधील मनमाडच्या खेळाडूंचे हे तिसरे पदक आहे. तामिळनाडूच्या के ओवीया हिने (स्नॅचमध्ये ७६ किलो, क्लिन अॅण्ड जर्कमध्ये १०० किलो) एकूण १७६ किलो वजन उचलून सुवर्णपदकावर नाव कोरले, तय आंध्र प्रदेशची अल्लू रेवाथी हिने (स्नॅचमध्ये ७८ किलो, क्लिन अॅण्ड जर्कमध्ये ९५ किलो) एकूण १७३ किलो वजन उचलत कांस्यपदक जिंकले.
