२ वर्षांपूर्वी खेळला होता शेवटचा कसोटी सामना
त्रिनिदाद ः वेस्ट इंडिज क्रिकेट संघाला नवा कसोटी कर्णधार मिळाला आहे. रोस्टन चेसची वेस्ट इंडिजचा नवा कसोटी कर्णधार म्हणून नियुक्ती करण्यात आली आहे.
वेस्ट इंडिज क्रिकेट संघ आयर्लंडला पोहोचला आहे आणि २१ मे पासून ३ सामन्यांची एकदिवसीय मालिका खेळणार आहे. एकदिवसीय मालिका सुरू होण्यापूर्वी वेस्ट इंडिज क्रिकेटकडून मोठी बातमी आली आहे. वेस्ट इंडिजला नवा कसोटी कर्णधार मिळाला आहे. रोस्टन चेसची वेस्ट इंडिजचा नवा कसोटी कर्णधार म्हणून नियुक्ती करण्यात आली आहे. जूनमध्ये ऑस्ट्रेलियाविरुद्ध होणाऱ्या कसोटी मालिकेत रोस्टन कसोटी संघाचे नेतृत्व करताना दिसणार आहे. ३३ वर्षीय चेस हा सलामीवीर क्रेग ब्रेथवेटची जागा घेईल. ब्रेथवेटने मार्चमध्ये ३९ सामन्यांमध्ये संघाचे नेतृत्व केल्यानंतर कसोटी कर्णधारपद सोडले होते. क्रेग ब्रेथवेटच्या नेतृत्वाखाली वेस्ट इंडिजने १० कसोटी जिंकल्या, २२ गमावल्या आणि ७ सामने अनिर्णित राहिले.
पुढील महिन्यात ऑस्ट्रेलियन संघ वेस्ट इंडिजचा दौरा करेल आणि ३ सामन्यांची कसोटी मालिका खेळेल. ही मालिका दोन्ही संघांसाठी २०२५-२७ वर्ल्ड टेस्ट चॅम्पियनशिप सायकल मधील पहिली मालिका असेल. २५ मे पासून बार्बाडोसमध्ये कसोटी मालिका सुरू होईल, जी अष्टपैलू रोस्टन चेसची कर्णधार म्हणून पहिली आणि कारकिर्दीतील ५० वी कसोटी असेल.
शेवटचा कसोटी सामना २ वर्षांपूर्वी खेळला होतारोस्टन चेस याने दोन वर्षांपूर्वी जोहान्सबर्ग येथे दक्षिण आफ्रिकेविरुद्ध आपला ४९ वा कसोटी सामना खेळला होता. तेव्हापासून वेस्ट इंडिज संघाने १३ कसोटी सामने खेळले आहेत. २०१६ मध्ये पदार्पण करणाऱ्या रोस्टन चेसने २६.३३ च्या सरासरीने २२६५ धावा केल्या आहेत, ज्यामध्ये ५ शतकांचा समावेश आहे. त्याने ८५ विकेट्सही घेतल्या आहेत. चेसने यापूर्वी एका एकदिवसीय आणि एका टी-२० सामन्यात वेस्ट इंडिजचे नेतृत्व केले आहे. कसोटी संघाचे कर्णधारपद स्वीकारताच चेसला ऑस्ट्रेलियाकडून कठीण आव्हानाचा सामना करावा लागेल. डावखुरा फिरकी गोलंदाज जोमेल वॉरिकन ऑस्ट्रेलियाविरुद्ध उपकर्णधारपदाची जबाबदारी स्वीकारेल.
मुख्य प्रशिक्षकाने दिला पाठिंबा
कर्णधारपदाची घोषणा करताना, क्रिकेट वेस्ट इंडिजने सांगितले की, रोस्टन चेसची निवड सहा जणांच्या शॉर्टलिस्टमधून करण्यात आली, ज्यांच्या विस्तृत मूल्यांकन प्रक्रियेनंतर, ज्यामध्ये मानसोपचार चाचणीचा समावेश होता. मुलाखत घेतलेल्या इतर उमेदवारांमध्ये जॉन कॅम्पबेल, टेविन इमलाच, जोशुआ दा सिल्वा, जस्टिन ग्रीव्हज आणि वॉरिकन यांचा समावेश होता. वेस्ट इंडिजचे मुख्य प्रशिक्षक डॅरेन सॅमी म्हणाले की, चेसच्या नवीन कसोटी कर्णधारपदी नियुक्तीला ते पाठिंबा देत आहेत. नवीन कर्णधाराने त्याच्या सहकाऱ्यांचा आदर मिळवला आहे, तो कसोटी कर्णधाराची जबाबदारी समजतो.
